Shillong, Iaiong 28: U Dawanpynshai Marwein uba dei u NCC Cadet jong ka 2 Meghalaya Battalion NCC/ Shillong Group na St Anthonys College, Shillong ula ioh khur ia ka Takma Ksiar ha ka kyrdan 3P (Three Positions), ha ka jingiakob siat kaba la pynlong da ka NER-NCC Directorate.
Ia katei ka jingiakob siat la pynlong ha Indira Gandhi Athletic Stadium, Guwahati naduh ka 18 haduh ka 26 tarik u Iaiong 2024, ha kaba u Dawanpynshai Marwein uba shong basah ha Nongpoh, Ri BHoi District, udei uwei napdeng jong ki 24 ngut ki dkhot ka NCC kiba la leit mihkhmat ia ka jylla Meghalaya.
Watla ka sngi kala shit kyr-ang bha, hynrei u Dawanpynshai ula pynleit jingmut ha ka jingiakhun ka jongu bad ula trei shitom ban ioh khur ia ka takma ksiar.
U Dawanpynshai ula pynpaw ia ka jingsngewnguh ia u NCC Instructor Staff jong ka 2 Meghalaya Bn uba la ai jinghikai ia u bad ia ki paralok ki jong u naduh kaba sdang haduh ki sngi kaba ki pynkhreh ban leit iakhun ha katei ka jongiakob khnang ba kin long kiba tbit.
Ka jingbtin lynti bad ka jingai jingkyrshan kaba pura ym tang ba kala pyntbit ia u ha ka kam iasiat hynrei kala ai mynsiem ia u bad kala pynshaniah skhem ia u ban ngeit halade ban ioh khur ia ka jingjop.
U Dawanpynshai ula dap da ka jingkmen halor kane ka jingjop bad kane kala long ruh ka jingai mynsiem ia kiwei pat ki dkhot jong ka NCC ha Jylla Meghalaya.
Ula pynpaw ba u don ia ka jingthrang bansiat bha shuh shuh haba u leit ban mihkhmat na ka bynta ka kynhun jongka NER NCC Directorate ban iashimbynta ha ka All-India NCC Shooting Competition bad ha ka Republic Day Parade 2025 Competition kaban long ha New Delhi.
