Kem ki Pulit ia 6 ngut ki runar ka kynhun khaii work order ba shna thok ka GHADC

Shillong, Jylliew 19 : Ki Pulit ka West Garo Hills kila ioh kyndang ia ka kynhun shukor ba shna thok ia ki kot ki sla ka Garo Hills Autonomous District Council (GHADC) ban thok ia ki supplier, bad ioh kem haduh 6 ngut ki briew na Assam bad Haryana bad ioh kurup ruh ia bun tylli ki work order ba shna thok ha ryngkat ka pisa ba T.50,000.

Kane ka jingiohkem kala wan jia hadien jong ka ejahar bala mudui da u Secretary ka GHADC, Tura myn ha ka 7 tarik Jymmang, 2026, bad ki jingtip bala ai da ki lanot kiba la ngat ha ki jingshah pynbiej kine ki riewshukor kiba kam ba ki dei kiba pynbeit ia ki kam supply mar jong ka Sorkar.

Haba shimkhia ia ki jingtip ba ka kynhun ki runar ka don ha Guwahati ban shukor ia u hehspah na Gujarat da ka work order thok ka GHADC, ka kynhun ki Pulit ba ialam da u Additional Superintendent of Police, West Garo Hills, kala hiar sha Assam ha ka 12 tarik Jylliew ban pynap shrip ha Greenwood Hotel.

San ngut ki runar la ioh ban bat bad la kem na katei ka jaka. Ia uwei pat la kem na Tezpur uba la tip kyrteng u Reeturaj Kaundinya ba 50 snem ka rta. Ia une la kem da kawei pat ka kynhun ba ialam da u Circle Inspector Sadar bad Office-in-charge ka Tura Police Station.

Kine ki briew kiba shah kem ki dei kiba la tip kyrteng kum u Narendra Singh (46) na Kamrup district; Dip Hazarika (53) na Guwahati; Kokkal Dutta, (58) na Bongaigaon; Taposh Mukherjee (45) na Faridabad, Haryana; Mridupaban Gogoi (40) na Golaghat; bad Reeturaj Kaundinya (50) na Tezpur.

Ha ka jingtohkit, ki Pulit kila ioh kurup ia ki work order ba shna thok ha ka kyrteng ka GHADC, ka Trading Licence ba shna thok ia kaba la ai sha ka kompani Om Sai Sarees, ba na Surat.

Ka jingtohkit ba malu mala kala lap ruh ba kane ka kynhun kala dep ban ioh lum pisa haduh T.3 lak na ki lanot bad ki dang thmu ban dawa sa ka commission ba 4% na ki work order ba shna thok kiba kot haduh T. 46 klur, ha ka por ba ioh kem ia ki.