Shillong, Naiwieng 03 : Ki Pulit ka East Khasi Hills, kila kem haduh 4 ngut ki samla kiba suba donkti ha ka jingshoh ia ki nongleit nongwan bad pynjulor ia ki kali, ha ka rally kyrduh kam bala pynlong da ka seng Federation of Khasi Jaintia & Garo People (FKJGP) myn ha ka 28 tarik Risaw ha Shillong.
U Superintendent of Police ka East Khasi Hills Bah S Nongtnger u pyntip ba ki Pulit hadien ka jingpynithuh ia ki briew kiba donkti ban jrongkti, kila pynlong ia ka jingkhynra hynnin ka sngi Balang bad hynne ka sngi Palei ha East Khasi Hills bad ha Ri-Bhoi District.
U pyntip ba ha kane ka jingkhynra, ki Pulit kila kem ia 4 ngut ki samla kiba donkti ha kane ka kam bymman katba kiwei pat kila phetrieh ban lait na ka jingshah kem.
Ia kine ki samla yn sa ialam tian bishar sha Iingkashari halor ka Laitumkhrah PS Case No 150 (10) 22 U/S 324/34/341/
353/ 505/ 506 IPC bad Shillong Sadar PS Case No. 246 (10) 22 U/S 120B/ 323 /34/ 341/ 353/427/505/506 IPC pule lang bad ka kyndon 3 jong ka Prevention of Damage to Public Property Act.
Une u Heh Pulit u pyntip ba ki Pulit ka District ki dang pynjur ia ka jingkhynra ban iohkem lut ia baroh ki briew ba donkti ha kaba pynmynsaw ia ki briew bad pynjulor ia ki kali ha ka rally ka FKJGP.
