Nongstoiñ, Naiwieng 3: Watla hapdeng ka jinghiar ka ïoh ka kot, ka kamai kajih ha West Khasi Hills, hynrei ha kum kane ka por kaba dei ka aiom ot, ki nongrep kba khamtam eh ki don hapdeng ka jingkmen bad phuhmut phuhmat bha, namar ka jingtrei shitom jong ki baroh shi snem kam shym long lehnohei, pynban ki la ïoh mad ïa ka jingkyrkhu kaba u Blei u ai ha ki.
Ha West Khasi Hills lah ban ong ba kumba 35% na ki nongshong shnong ki dei kiba im ha ka bylla kum ka kam tih dewïong, trei misteri bad kiwei. Katba 50% pat ki dei kiba im ha ka rep ka riang.
Ha kine ki sngi ha ka jingjurip jong Ka Shlem ïa kiba bun ki shnong hapoh ka District, la lap ba ki paidbah nongshong shnong ki la sdang ban ïa bunkam bha naduh dang step ban khreh ka shet ka tiew, ka bam ka dih namar ka aïom ot ka la sdang.
Ki longkmie bad ki khun samla kynthei ki la bunkam ha kaba pynbiang ïa ki rashi ki jaiñ sop khohwah shuwa ban ot ïa u kba, Ki longkpa bad ki khun shynrang, ki la ïa bun kam ha kaba pynkhreh ïa ki thiar ban buh kba, ki khmat ban shoh kba. Ha kine ki sngi ki nongrep ki heh mynsiem bad ki phuhmut phuhmat bha, namar ka por ka la dei ba kin kheit ïa u soh ka jingtrei shitom jong ki baroh shi snem.
Haba ïakren bad ki katto katne ki nongrep, ki la ïathuh ba mynta u snem ka rep ka riang ka kham bha namar kam shym don kano kano ka jingshah ktah ha ki bor ka mariang naduh ka por ba sdang ban thung haduh ka por ba u kba u la sdang ban sei. Nalor kata ka jinghap u slap ruh ka biang bha kat kum ka jingdonkam jong ki pynthor.
Ki la ong ba lada ka long kumba long ha une u snem, watla ka kamai kajih, ka hiran bad ka ïoh ka kot ka hiar haduh katta katta ruh, hynrei ïa ki nongrep kam da ktah than namar ki don kyrhai ka bam.
U Bah W.Nongsiej uwei na ki nongrep kba ka thaiñ Nongstoiñ, u la ong ba ki don ki snem kiba ka don ka jingpynjot jong u phria ïa ki sohkba kiba la mih shylluit. Hynrei mynta u snem u dei u snem u ba kham bha bad ka jingshah pynjulor kam don. Kane u ong ka dei ka jingkyrkhu kyrhai jong u Blei.
U la ong ruh, “Watla ki babu sorkar ki rben ka pla pisa, hynrei ban ïoh khaw ki hap mane ïa ngi ki nongrep. Ngim khuslai ka bam ka dih ngi don kyrhai, ka ja na ïing ka doh na sem. Lada ngi koit ngi khiah lei lei ngim ju khuslai ei ei”.
