Shillong, Risaw 08 : Ki Pulit ka East Khasi Hills kila ioh ban kem ia arngut ki nongtuh thuk thuk kiba la phla ruh ba ia ka thuk thuk ba ki tuh, kila dep ban khaii sha Bangladesh.
Kine ki arngut ki kyrteng u Shabamutlang Syiemlieh ba 23 snem na Mawpun, Golflink bad u Cornelius Mukhim ba 20 snem na Mawlai Mawroh.
U Superintendent of Police (Traffic) ka East Khasi Hills, u iathuh ba ki Pulit ka Lumdiengjri PS kila ioh pdiang ia ka ejahar ha ka 4 tarik Risaw ba shah tuh kawei ka thuk thuk Royal Enfield Hunter 350 ba don u nombor ML05-AF-7596 na ka thain Riatsamthiah Block-II.
U iathuh ba ha ka jingtohkit bad na ki sakhi bala ioh lum, ha ka 7 tarik Risaw, ki Pulit kila iohkem ia u Shabamutlang bad da ka jingphla jong u, la ioh ban kem sa ia u Cornelius uba ialam ban leh ia kane ka kam bymman.
U iathuh ba kine ki arngut kila phla ba ia kane ka thuk thuk lah dep ban khaii sha Bangladesh.
Ka jingtohkit mynta ka dang iaid shakhmat ban lapdien ioh dang don kiwei pat ki briew kiba donkti lang.
