Nongpoh, Naiwieng 03: U Superintendent of Police ka Ri-Bhoi ula maham ban leh da kaba tyngeh ia ki briew kiba pynsaphriang ia ki khubor hamsaia kiba pyntieng pynsmiej ia ki riew paidbah.
Kane kala jingmaham kala mih hadien ka jingsaphriang ka video bad ka dur ha ki rynsan social media ba pyni ia ka kynhun ki briew kiba iaid hapdeng ka miet ia kaba la kynnoh ba ki dei na ka kynhun ba khlong ia ki dohnud bad khyllai jong ki briew.
Lah kynnoh ba kane ka kynhun kaba dei jong ki bar jylla kala poi mynta ha Ri-Bhoi district bad kala leit rung ha man ki shnong ki thaw ha kaba la maham ia ki paidbah ba kin phikir bad ban apmiet ia kane ka kynhun. La kam ruh ba kane ka kynhun kala shah kthong ruh ha kawei ka shnong ha Ri-Bhoi.
Kaba kham sngewtriem shuh shuh ka long ba kane ka kynhun ka kham phai khmat sha ki khyllung ban khlong ïa u Dohnud bad ki khyllai lada ki ioh lad.
Kane ka khubor social media kala pynpar ñiangkhriat ruh ïa ki paidbah da kaba ai ruh ia kawei ka dur khyllung kaba la pyni ba la shah khlong ïa u dohnud, khyllai bad ki dohjem.
U Superintendent ka Police ka Ri Bhoi, u Giri Prasad ula pyntip ba ki Pulit kila wad jingtip halor kane ka khubor bala pynsaphriang bad shem ba ka dei tang ka khubor hamsaia bad ym shym lap ruh ban don kum katei ka kynhun.
Une u Heh Pulit ula ong “wat la katta ruh ki Pulit ki dang pynlong ïa ka jingtohkit halor kane ka jingpynsaphriang ïa ka khubor lamler kaba la ktah ïa ka jingmut jingpyrkhat jong ki paidbah bad na ka liang ki pulit kin sa wad ruh ïa ki nongpynphriang ïa kane ka khubor lamler bad ban leh katkum ki kyndon ka ain”.
