Shillong, Naiwieng 3: U Myntri Rangbah ka jylla Conrad K Sangma, hynne ka sngi Palei ula plie ia ka Rising Sun Water Fest 2022 ba lai sngi ha Umiam Sports Complex.
I wish all the participants the very best. May the best club win! pic.twitter.com/NaAjYk20Bf
— Conrad Sangma (@SangmaConrad) November 3, 2022
Haba kren ha ka jingialang, u Myntri Rangbah ula ai khublei ia ki nongpyniaid haba ong ba kane ka Water Festival kaba heh kat kane ka dei ka ba la pynlong ha ka sien ba nyngkong eh hapoh ka Jylla.
“Ka Meghalaya ka dei kaba la kyrkhu da ka jingdon kyrhai ka spah mariang haba phai sha ka jingdon ki wah. La kyrkhu ia ngi da ki pungum, ki kshaid bad ka mariang kaba itynnad hynrei ngim shym la lah ban pyndonkam thikna ia ki haba phai sha ka jingailad ia ki briew ba kin long shibynta jong ki bad ruh ban thaw ia ki lad ki lynti ha ki kam jngohkai” ula ong.
U Myntri Rangbah ula ong ba ka Sorkar ha kine ki khyndiat snem wat hapdeng shibun ki jingtynjuh namar ka khlam Covid bad ka jingpynsangeh ia ki kam jngohkai, kala pyrshang ban pyndonkam ia ka spah mariang bad thaw lad ban kyntiew ia ka kamai ka kajih jong ki nongshongshnong ka Jylla haba pynthikna ba ka Meghalaya kan long kawei na ki jaka ba jied da ki briew kum ka jaka shangkai.
Ula ong ruh ba ka dei ka jingangnud jong ka sorkar ban pynlong ia kum kine ki tamasa kum ka tamasa ba tip ka pyrthei ka ban long manla u snem.
Ka Indian Army bad ka Sorkar Meghalaya kum shibynta jong ka prokram Khelo India kan sa pynlong ia ka jingiakop kieng lieng ha ka sien ba nyngkong eh.
Kane ka tamasa kan iohi ia ka jingwan iashimbynta na ki Club ba pawnam jong ka Ri India.
Kiwei pat ki jingpynbyrngia ha kane ka water fest ki kynthup ruh ia ki jingpyni nam ia ka deiti tynrai, ka food fest, ka jingpyni nam ia ki tiar thain bad dro dur nalor ka water sport ha kane ka water fest.
