Shillong, Risaw 08 : Ki Pulit ka Mairang Police Station kila kem ia u kurim Kursur L Mawlong na Maroid namar ka jingsuba don eiei ha lyndet ka jingiap ka kurim ba na Umkaduh, Ri-Bhoi, kaba leit budkai ia u sha Maroid ha ka sngi Saitjain bala lah.
U Superintendent of Police ka Eastern West Khasi Hills, u pyntip ba ki Pulit ka Mairang Police Station kila register case ia kane ka jingjia ha ka 7 tarik hadien ka jingioh pdiang ia ka ejahar halor ka jingiap ka kong Sperly Syngkli ba na Umkaduh.
Kane ka Longkmie kaba la don arngut ki Khun, kala leit bud iala u kurim ban iasahkai ha shnong jong u ha Maroid hynrei ha ka step 6 tarik, la pyntip noh ba kala khlad khlem da tip ia ka daw.
Khang ban pynthikna ia ki daw ka jingiap, ki Pulit kila rah ia ka metiap sha Civil Hospital, Nongpoh ban leh post mortem bad mynta ki dang ap ia ka kaiphod.
U SP u pyntip ba kum shibynta jong ka jingtohkit, ki Pulit kila leit tohkit ia ka jaka ba jia kane ka jingjia da ka jingiarap ka Crime Scene Unit bad kila lum ruh ia ki sakhi satar ban ioh bishar. Ha kane ka jingleit tohkit ba kilakem ia u kurim Kursur L Mawlong ban tohkit.
U pyntip ba ka jingtohkit mynta ka dang iaid shakhmat.
