Tura Nailar 03: Lai ngut ki briew, kiba thmu ban thaw ia ka kynhun dawa pisa ha ki bynta bapher bapher jong ka Garo Hills, kila shah kem ryngkat bad ki tiar siat ha ka sngi Palei, halor ka jingkynnoh ba ki donkti ban pyniap ia kawei ka longkmie ha ka thain Jadigittim jong ka South Garo Hills District.
Kine ki briew kiba la shah kem ki kynthup ia u David R Marak uba la khot sin da u Bitbit na Kacharipara, Goalpara, Assam, u Demen R Marak bad u Sainara R Marak na Bajengdoba, North Garo Hills, la pynpaw ki pulit.
Ha ka jingtohkit, la ioh kurup ar tylli ki pistol bad ar tylli ki wait bad kawei ka tari na ka met ka jong kitei kiba shah kem, ia kaba kila pyndonkam ha ka por ba ki leh ia ka kam sniew, la iathuh.
Ki pulit kila iathuh ba kitei ki briew kiba la shah kem ki don ia ka jingthmu ban seng ia ka kynhun dawa pisa ha kylleng ki bynta jong ka rilum Garo.
Lah ban kdew ba la thaw iaka Special Investigation Team (SIT) ban ai jingkyrshan ia u IO uba tohkit ia katei ka jingjia halor ka jinglap ia ka metiap jong kawei ka kynthei na ka thain Jadigittim Area ha ka 30 tarik u Jylliew.
La rejistar case ia katei ka jingjia bad pynngat ha ki kyndon U/S 376/302.
Ka SIT lyngba ki sakhi satiar kiba biang bad ka jingpyndonkam iala ka buit jingstad kala lah ban ithuh ia kitei ki 3 ngut kiba donkti, la iathuh ki pulit.
