Shillong,Nailur 12 : Ki Pulit kila kem biang sa ia uwei u nongialam ka Khasi Students Union (KSU) halor ka jingjia kam thombor ha ka rally thuk thuk ka KSU myn ha ka 19 tarik Nailar.
Une u nongialam ka KSU u dei u Banjop Dkhar, President ka KSU Shillong Mihngi Circle, uba dei ruh uba hynriew na ki nongialam ka KSU bala kem da ki Pulit.
Ka kynhun Special Investigation Team (SIT) jong ka Tnad Pulit kala kem ia une u nongialam ka KSU najan NEIGRIHMS ha ka miet sngi Thohdieng. La ialam tian bishar ia u hynne ka sngi sha Iingkashari, iathuh u nongialam ka KSU ha ka sngi Saitjain.
Shuwa u Banjop, 5 ngut ki nongialam ka KSU kila don hapoh ka judicial custody-u President Raymond Kharjana, Vice President Pynkmenlang Sanmiet, General Secretary Reuben Najiar, Assistant Organising Secretary Jeremaiah Pohthmu bad u General Secretary ka Shillong Mihngi Circle Samuel Kharbani.
Ka rally thuk thuk ha ka 19 tarik Nailar kala pynmih ia ki kam thombor kaba lam sha ka jingshah thang 2 tylli ki kali, shah pynjulor haduh 31 tylli ki kali bad shah shoh haduh 18 ngut ki briew.
Ki Pulit kila pynngat ia kine ki nongialam ka KSU hapoh ka MMPO Act, Prevention of Damage to Public Property Act bad ka BNSS namar ka jingialum paidbah beain.
