Shillong, Nailur 23: Ki Pulit ka Anti Narcotics Task Force (ANTF) hynnin ka miet sngi palei, kila ioh ban kem ia 4 ngut ki nongkhaii droks ba kynthup ia kawei ka kynthei ha ki thain Mawlai.
Ia kine ki briew la ioh kem ha ka jingkhynra bad na ka met jong kine ki nongkhaii droks la ioh ban kurup haduh 25 synduk sabon u droks heroin ba khia haduh 319.17 gram, bad u ganja ba 14.24 kilo.
Ka ANTF kala ioh ruh ban kurup ia 7 tylli ki mobile phone, ka pisa ba T.4,50,830 lem bad ka kali Wagon R ba don u nombor ML04-C-1659.
Ia kine ki briew la register case ha Mawlai Police Station bad la pynngat ia ki ha ka kyndon 20(b)(ii)(A)/21(c)/25/27/29 jong ka NDPS Act. Ka jingtohkit ia kine ki briew ka dang iaid shakhmat.
