Shillong, Nailur 23 :Ka Jylla Meghalaya kala shah jied ban ioh ia ka khusnam halor ka jingtreikam pura jong ki kor-um bala pynpoi sha ki thliew Iing haki jaka nongkyndong jong ka Jylla.
Kat kum ki kyndon bala buh, ka Jylla Meghalaya kala shah jied ia kane ka khusnam halor ka kyrdan “Overall Functionally of Tap Connection” (jingtreikam pura ki kor um ha Iing) hapdeng ki Jylla/Union Territories ba don hapoh 60% ki kor um ba treikam pura ne ki Functional Household Tap Connection (FHTC), pyntip ki Heh Ophisar ka Jylla hynne ka sngi thohdieng.
Ia ka jinglum jingkhein ia ka jingtreikam pura ki Um-Iing ha Jylla, la pynlong da ka Tnad kaba hap hapoh ka Ministry of Jal Shakti lyngba ka kynhun-Hindustan Thompson Pvt Ltd kaba la leit rung sha ki jaka nongkyndong jong baroh ki Jylla/UT mynta u snem 2022.
Haba pynshong nongrim ia kane ka jinglum jingkhein, la shim ia ka rai ban ai khusnam ia ki Jylla/UT kiba pyntreikam bha ha ka jingialang ‘Swachh Bharat Diwas’ ka ban long ha ka 2 tarik Risaw ha Vigyan Bhawan, New Delhi.
Katto katne na kine ki khusnam yn sa sam da ka President ka Ri India ha kane ka jingialang.
