Shillong, Nailur 1: Ki pulit ANTF ka East Khasi Hills ha ka miet 31 tarik Nailar kila khynra ia kawei ka iing ha Lumjingsuk Block A, Madanriting bad kila ioh kem ia 3 ngut ki samla kiba donkti ha kaban die drok beain.
Ia katei ka jingkhynra la pynlong ha ka por 8 baje mynmiet bad na katei ka iingsah la ioh kurup ia u drok uba don 26.61 gram, 4 tylli ki mobile phone, ka pisa T.31380, uwei u thyrnia injekshon, ki tin, ki jaka buh sabon kiba la thep ia u drok, kawei ka Thuk Thuk kaba don ia u number MLO5L 1689, kawei ka kali Alto kaba don ia u number MLO5T 9261.
Ki pulit kila iathuh ba ki 3 ngut kiba la shah kem ki kynthup ia u Ronald Laloo, Thangbawi Paite bad u Banphiralang Shabong.
Ia kine kiba la shah kem la pynngat ha ki kyndon jong ka NDPS Act halor ka jingdonkti ban khaii drok beain.
