Tura, Nailur 01 : Ki Pulit ka North Garo Hills hynne ka janmiet sngi palei, kila ioh ban kem ia uwei u Nongkhaii tuh ia ka ksiar bad ioh ban kurup ia ka ksiar haduh 40 tola kaba shongdor ym duna ia ka T. 25 lak.
Ia une u Nongkhaii ksiar la ioh ban kem na ka thain Bajengdoba, North Garo Hills ha ka jingtalasi kali ha Rari Point bad la tip kyrteng ia u da u Hamidul Hoque ba 27 snem ka rta uba de na Cooch Behar, West Bengal.
U Superintendent of Police ka North Garo Hills u Shailendra Bemaniya ula pyntip ba une u briew u dei ula wan sha Tura da kawei ka Bolero pikup ha ka por ba ioh bat da ki Pulit.
“Ngi dang pynlong ia ka jingtalasi kali ia ki mar beain hynnin ka miet hapdeng ka Rari bad Bajengdoba ha ka por ba ki Pulit jong ngi kila pynieng ia ka bolero pikup ba khlem nombor. Haba ki talasi ia ki kot ki sla bad dang khynra, ngi la shem ia 4 tylli ki ksiar biskit bala buhrieh hapoh” ong u Shailendra.
Ia une u briew la rah noh sha Thanad Bajengdoba ban pynlong ia ka jingtohkit kaba bniah bad ban tih tynrai ia ka jaka ba u ioh ia kane ka ksiar bad ka jaka ba u thmu ban pynpoi.
U Pyntip ba ha ka jingtohkit, une u briew u khlem lah satia ban batai lane don ki kot ki sla ba iadei bad ka jingthied ia kane ka ksiar bad kumta la kem bad la phah noh ia u sha Iingkashari ban tian bishar.
