Shillong, Nailur 1 : Haduh 500 tylli ki longiing kiba hap ha ka Mawryngkneng Constituency ki la ioh da ki khun sniang mar saw tylli kum shi bynta jong ka Rural Backyard Piggery Scheme jong ka National Livestock Mission ha ka jingialang kaba long ha Tynring hynne ka sngi.
Ia kitei ki khun sniang ba kynthup lai tylli ki sniang kynthei bad uwei u sniang shynrang la sam da u Symbud Myntri Rangbah ka Jylla Bah Prestone Tynsong ha ryngkat ka jingdonlang u MLA ka thain Bah Pynïaid Sing Syiem.
Haba kren ha katei ka jingialang u Bah Prestone u la iathuh ba lyngba katei ka sienjam ba ka tnad Kam ri jingri ka shim, kin don haduh 16000 tylli ki longiing na ki 46 tylli ki block Jong ka jylla kin ioh ia kitei ki khun sniang ha kane ka sien pyrshang kaba mynta.
“Kine ki khun sniang ba ngi sam mynta kin long ka jingkyrkhu ia baroh ki longiing ba duk tam ba kin lah ban kyntiew ia ka kamai kajih jong ki,” u la ong da kaba pyntip ba ka sorkar ka aiei ia kitei ki khun sniang sha kitei ki longiing kiba la jied kyrpang tang ia kiba dei hok ban ioh nyngkong.
U la pynshai ruh ba ki nongioh sniang kin sa sdang ban ioh kamai tang hadien 6 bnai ei ei hadien ba kitei ki sniang kynthei ki sdang ban kha khun.
“Lada kawei kawei ka sniang kynthei ka kha 6 tylli ki khun sniang kamut arsien shisnem ki la poi 12 tylli. kumta lada die tang 4000 tyngka iwei i khun sniang na kawei kawei ka sniang Kmie phi la ioh kamai 48000 tyngka bad lada khein baroh lai tylli phi la ioh kamai bun bha,” u la ong.
U Bah Prestone u ong ruh ba ka sorkar ka buh thong ruh ban buddien ia ka jingpyntreikam ia kitei ki skhim khnang ba lada ki ai shisha ka jingkyrkhu lane kyntiew ia ka kamai kajih khlem artatien kin pynbun shuh shuh ki nongioh jingmyntoi ha ki snem ban wan ruh.
Katkum ka jingong jong u lada ki paidbah baroh ki lah ban pynheh bad pyniar ia katei ka kam ri sniang khlem pep ka jylla kan lah ban pyndap ia ka jingdawa dohsniang kaba duna haduh kumba 10000 MT. ha ka shisnem.
Ha kane ka sngi la ioh ruh ia ka jingkren na u Pyniaid Sing Syiem, MLA Mawryngkneng Constituency, G H P Raju, Principal Secretary AH&Veterinary, Dr Manjunatha C, Secretary AH & Veterinary bad kiwei kiwei.
