Donkam thied noh ka Sorkar ia ki jaka ba jan ki Catchment Area ban iada tyllong um
Shillong, Nailar 26: U Myntri ka Tnad Public Health Engineering (PHE) ka Jylla Bah Renikton Lyngdoh Tongkhar ula ong “Ka Um ka dei ka jingim bad khlem ka um, ym don ba lah ban im. Namar kata ka long kaba donkam ban tyngkai kat kaba lah bad sngewthuh ia ka jingkordor ka Um”.
U Myntri ula kren ia kine ki kyntien ha ka North East Water Conclave bala pynlong da ka Indian Chamber of Commerce hynne ka sngi thohdieng ha State Convention Centre, Shillong.
“Ka Um ka dei ka jingim bad khlem ka um, ym don satia ba lah ban im. Ngi long kiba donbok ban ioh ei ia ka um hynrei ki don ki khep ba ngim nang ban pyndonkam ia ka” ong u Bah Renikton.
U Myntri ula kyntu ia ka jingialang ban tyngkai ia ka um haba don ka lah bad ban pynmlien ruh ialade ban long ki nongsumar ia ka um bad ban sngewthuh ia ka jingkordor ka um.
U Myntri ula ban jur ruh ia ka jingdonkam ban thied noh ka Sorkar ia ki jaka ba marjan ki Catchment Area ne ki jaka khlaw ba don ki tyllong um khnang ban lah ai jingiada ia kine ki tyllong na ki jingtrei jingktah jong ki briew kaba lah ban buh ha ka jingim ia ka jingneh jingsah kine ki tyllong.
“Watla ka Jylla ka ioh pahuh bha ia u slap, hynrei kyndit ban tip ba ka um kam lah satia ban ngam shapoh pynban ka shu tuid ei sha ki jaka them” ula ong.
“Donkam ban don ka jingwad bniah halor kane ka bynta khnang ban lap ia ki lad ki lynti kumno ban lah pynneh ia ka umslap kaba ka jylla ka ioh” ula bynrap.
Ha kajuh ka por, u Myntri ula pynpaw ia ka jingsngewkhia halor ka jingnang bun ki tyllong um kiba la kylla rkhiang noh bad ong “Namar kane, la hap ban rah ia ka skhim ka Sorkar na kawei ka tyllong sha kawei pat bad kala shimpor ban pyndep ia ka kam, kaba ktah pat ia u paidbah salonsar”.
Haba pynpaw ia ka jingsngewkhia halor ka jingrkhiang noh ki Check Dam bad ki Wah, ula kyntu ia ka jingialang ban iathir sani halor kane ka bynta ha kane ka Conclave namar ka dei ka jingdonkam ba kyrkieh ban wad ia ki daw balei ba kane ka jia kumne.
Kiwei pat kiba la kren ha ka jingialang ki kynthup ia u Dr S C Sadhu, Secretary Water Resource Department, Meghalaya, u Aankur Patni, Executive Director, Ion Exchange India Ltd, u Sourav Daspatnaik, Managing Director, Swachh Environment Private Limited bad kiwei kiwei.
Hadien kane ka jingialang plie la pynbud pat da ka Plenary Session ha kaba ki nongkren kila kren bniah halor ka mat Upgradation of water & waste water infrastructure and Leakages in water conveyance lines and storage.
