Shillong, Nailar 26: Ka District Tuberculosis Center, East Khasi Hills District ka la khot ia baroh ki nongshongshnong ban ia snohkti lang na ka bynta ban rat dyngkhong noh ia ka jingpang TB kaba don ha ka jylla.
Kumta hapoh ka National Tuberculosis Elimination Programme jong ka National Health Mission, Meghalaya, ka jingiakhun ka la iaid mynta shakhmat ban ai jingpynshai kylleng halor katei ka jingpang bad ruh kumno ban lah pynkhuid phar ia kane ka jingpang na kane ka jylla.
Da kaba buh shwa hakhmat iaki jingdonkam ban pynsngewthuh shaphang katei ka jingpang, na ka liang ka District Tuberculosis Office, East Khasi Hills District hynne ka sngi ka la pynlong ia ka jingai jinghikai paidbah ha H. Elias Memorial Higher Secondary School, Shillong ha kaba ki khynnah skul bad ruh ki nonghikai ki la ioh jinghikai halor katei ka mat ba kin tip kumno ban leh haba ki iohi bad lap ia ki dak kiba iadei bad ka jingpang TB.
Shwa kane la ioh ruh ia ka jingkren na u Principal jong ka skul, u Brother Anan Prakash Lakra nangta la ioh ruh ia ki drama lyngkot halor ka jingpang TB ba la ai da ki samla pule Bachelor of Social Work na St. Edmund’s College bad Women’s college. Lyngba katei ka drama lyngkot la pynsngewthuh ruh ia baroh ba ka jingpang TB kadei kaba lah ban sumar bad pynkoit hynrei ka donkam pat ia ka jingshimkhia da ki paidbah ban mih shakhmat ban shah sumar
Haba bynrap lang, u Bah Gilbert Kurbah ba dei ruh u District Programme Coordinator u la ai ka jingbatai kaba lyngkot da kaba banjur ba ki khynnah skul ki don ka bynta kaba khraw bha ban ai jigntip ia kiba haiing ha sem halor kumno ban iada bad tip shaphang ka jingpang TB ha ki iing ki sem jong ki kaba kiioh lyngba katei ka prokram.
Na ka liang i Dr. E Kharmuthi, District MCH Officer haba kren kum i Kongsan i la batai bniah shaphang ka BCG Vaccination bad ruh kumno ban ithuh ia ka jingpang TB naduh dang sdang.
Na kaliang u Bah Oniwell Mylliemngap pat u la ong ba dei tang ka jigniatrei lang kaba lah ban pynurlong ia ka distrik ban lait bad pynduh syndon ia ka jingpang TB na ka distrik bad ka jylla baroh kawei.
Ha ka jingkren pynkut, ka Kong Tracy Kharkamni kaba dei ka State Co-ordinator kala shim kyntu ia ki samla pule ba kin wan shakhmat ban snohkti lang na ka bynta ban pynphriang ia ka khubor kumno ban iada bad pynshai halor katei ka jingpang TB bad khamtam eh ban weng noh ia ka jingpeit bein ia kito kiba iabit ia katei ka jingpang.
Ha kane ka prokram la donlang ruh ki nongtrei na ka District Tuberculosis Center, East Khasi Hills District bad Nongthymmai Urban Primary Health Center nalor kiwei kiwei.
