Shillong, Jymmang 15 : Namar ka jingkiew dor ka umphniang ha baroh kawei ka pyrthei namar ka thma ha Middle East, u Nongaiktien ka Meghalaya BJP Bah M Kharkrang ha ka sngi Thohdieng, ula ong ba ki” jinglong jingman ki long palat ia u pud ba lah ban leh eiei ka Delhi” bad kyrshan ia ka jingkyntu u Myntri Rangbah Duh Narendra Modi ban kham tyngkan ia ki jingpynlut ban lah pynneh ia ka foreign exchange (jingbujli pisa).
“Ka Sorkar kala pyrshang ban tehlakam ia kano kano ka jingkiew ha ka dor petrol sha u pud ba ki kompani umphniang kila mad ia ka jingduhnong ba kot da ki hajar klur man ka sngi bad ka pork an sa poi ba kin ym lah shuh ban kyrda ialade” ong u Bah Kharkrang.
Ula pynpaw ba kane ka jingkiew dor ka umphniang ka dei ka jingeh bala mad da ka pyrthei baroh kawei. “Kane ka dei ka jingeh bala mad da ka pyrthei baroh kawei bad nga sngew ba ngi hap ban pdiang ia ka” ula ong.
“Kaei kaba jia ha Middle East ka long palat ia u pud ba lah ban leh eiei da ka Ri bad ka Sorkar Pdeng. Kum kine ki kam ki ju ktah beit. Ngi hap ban iai shah bad ka” ula ong.
Haba kyntu ia ki paidbah ban iatreilang, ula bynrap “Nga kyrmen ba ki paidbah ruh kin shah skhor bad shim ia ki lad ki lynti ban tyngkan ia ka jingpynlut kiba u Myntri Rangbah Duh ula kyrpad ia baroh ki nongshongshnong jong ka ri khnang ba ngin lah ban khang ia ka jingbujli pisa (foreign exchange) ba kan mih na ka Ri bad kat kaba don ka Foreign Exchange kan neh beit hapoh ka Ri”.
“Kane kam dei halor ka Sorkar Pdeng ne ka Sorkar BJP lane kano kano ka Sorkar. Kum ka Ri. Kum ka Ri ngi hap ban iai shah ia kane bad ngi hap ban iakhun lang” ong u Bah Kharkrang.
Halor ka jingpynkut iakane ka jingeh, ula ong “Baroh ki kwah ba ka tma kan kut noh. Baroh ki Ri kiba ieid ia ka jingsuk kin kwah ba kane ka thma kan kut noh namar ka ktah ia ka khaii ka pateng, ka ioh ka kot jong baroh ki Ri ka pyrthei. Ka Sorkar Pdeng ka hap ban shim ia bun ki sienjam. Tang kawei ka lynti kaba nga iohi ka long ba kane ka thma ha Middle East kan sangeh noh”.
Haba pynshai ia ka jingai jingmut u Myntri Rangbah Duh ban trei na kano kano ka jaka ba iadon, u Bah Kharkrang ula og “Kat kaba lah-kam dei kaba ngi ong ban trei na Iing-hynrei na kano kano ka jaka, ngi lah leh ia kane ha ka por jong ka khlam Covid bad u (PM) ukhlem pynbor hynrei ula ong ba kat kaba lah. Hooid, ki nongbylla kin ym lah ban trei na iing hynrei ki don bun kiwei ki kam kiba lah ban trei na Iing”.
.){kind=link}