Guwahati, Jymmang 15: Ki nongshong shnong jong ka Guwahati ha ka sngi Thohdieng ki la pynpaw pyrshah halor ka jingkiew dor jong ka Petrol bad ka diesel, ha kaba ka dor jong ka umphniang ka la palat ïa ka 100 tyngka ha katei ka nongbah hadien ka jingkiew dor kaba khatduh eh kaba la pynbna da ki kompeni umphniang.
Ki kompeni umphniang ha ka sngi Thohdieng ki la pynbna ban pynkiew dor kumba 3 tyngka shi litar ia ka dor jong ka petrol bad ka diesel, kaba la pynlong ia ka dor umphniang ban kiew ha kylleng ki nongbah metro. Kane ka jingkiew dor ka wan hapdeng ka jingkiew dor ha ka pyrthei kaba ïadei bad ka jingïakynad kaba dang ïaid shakhmat ha West Asia.
Ha ka petrol pump jong ka Goswami Service ha Slipukhuri, Guwahati, u manager u Santanu Baishya u la iathuh ba ka dor jong ka petrol ka la kiew na ka T.98.20 sha ka T.101.21 shi litar, katba ka diesel pat ka la kiew na ka T.89.42 sha ka T.92.50 shi litar.
U Baishya u la ong ha ki lad pathai khubor, “Mynshwa ka dor jong ka petrol ka long T. 98.20, mynta ka la kiew da T. 3.01 bad ka la poi sha ka T. 101.21.Ka Diesel mynshwa ka long T. 89.42 bad mynta ka la long T. 92.50, ka jingkiew kaba T. 3.08. namar ki donkam ia ka na ka bynta ka jingleit jingwan ba man ka sngi Wat lada ki dor ki nang kiew shuh, ki briew kin dang hap ban thied ia ka petrol bad ka diesel.”
U la bynrap ba watla ki nongthied ki lah ban pyrshang ban pynduna ïa ka jingpyndonkam umphniang, hynrei ki nongleit nongwan man ka sngi ki don tang khyndiat ki lad ki lynti.
Uwei u samla uba la tip kyrteng kum u Biraj Saha u la ong ba katei ka jingkiew dor ka la pynjynjar shuh shuh ia ki riew paidbah.
“Ka dor ka la kiew bha, mynshwa ka long T. 98, mynta ka la long T. 101.Nga la pyndap ia ka tank jong nga mynta ka sngi namar ki dor ki lah ban kiew shuh shuh nangne shakhmat, ki briew mynta kin hap ban pynduna ia ka jingleit jingwan bym donkam bad ban pyndonkam kham bun ki kali paidbah”, u la ong.
Uwei pat u nongshong shnong ba la kham rangbah jong ka Guwahati, u Nirmal, u la ong ba ka jingkiew dor jong ka umphniang ba man ka por ka pynlong ia ka jingim jong ki riew paidbah kaba eh.
“Ka la nang eh haduh katta katta ia u riew paidbah.Hynrei ki briew kim lah ban sangeh syndon ban pyndonkam ia ki kali.Ki dang hap ban pyniaid ia ki kali bad ki bike na ka bynta ki kam ba man ka sngi”, u la ong.
