Shillong, Risaw 22: U Nongialam ka BJP bad Myntri ka Sorkar Pdeng Kiren Rijiju hynne ka sngi Saitjaiñ ula sngew ba ka sorkar NDA ka don iaka bynta kaba khraw ha ka synshar khaddar ha ka jylla Meghalaya lem kumta kan long ka jingduh jingmyntoi ia ki paidbah.
Ula ong, ki paidbah ka Meghalaya kila jied iaka MDA kaba la ialam da ka NPP kaba ialam da u Conrad Sangma bad kine kila treikam bha hynrei ula pynpaw iaka jingthrang baka BJP ka don iaka bynta kaba kham khraw ban trei ha ka sorkar, namar ka jingailad iaka BJP ba kan trei borbah kan wanrah ia ki kam pynroi bad kan long ka jingmyntoi ia ki paidbah.
“Nga la iohi, haba ka BJP ka don haka bor synshar ne ka BJP ka don bynta ha ka kam sorkar, ki paidbah ki ioh iaki jingmyntoi kiba bun namar ba ka BJP ka don tang kawei ka thong kata ban trei naka bynta u paidbah” ong u Rijiju.
“ Ngi trei ha ka lynti jong ka mishon, ngim don por naka bynta ialade hi. Ngi aiti lut naka bynta u paidbah, kumta ka Meghalaya ka dei ban ioh bun ki MLA na ka seng BJP” ula bynrap.
