Shillong, Lber 26: U Myntri ka Sorkar Jylla u Bah Paul Lyngdoh uba long ruh u Nongaiktien ka sorkar ha ka sngi Balang ula ong, ba ka sorkar kan sa shimkhia lada ka ioh pdiang ia ka jingujor ba kala don ka jingialam ia ki khynnah rit shabar ka jylla.
Ula jubab ia kane kadei halor ka jingdawa ba dei ban pynlong ia ka jingtohkit da ka State Fact Finding Team ban tip ia ka jingdon jong ki khynnah shynrang bad kynthei kiba la shah ialam ha ki kynhun na ka bynta ban ioh ei ia ka jinghikai shabar ka jylla, hadien ba kala don ka jingjia ba ki khynnah kila ioh ia ka bam kaba la sah (food poisoning) ha ka jylla Karnataka, ha kaba ar ngut ki khynnah pule na Meghalaya kila duh noh ia la ka jingim.
Haba iakren bad ki nongpathai khubor u Bah Paul Lyngdoh ula ong, “Ka nongrim jong ka sorkar ka long beit ban pynthikna ia ka jingshngain ia man la u nong
Meghalaya, kiba leit ne pule shabar ka jylla, bad dei na katei ka daw ba u
Commissioner & Secretary ka Tnad Home ula leit hi dalade ban mihkhmat ia ka jylla ban leit jngoh ia ka hospital, ha kaba ki arngut kila khlad noh”.
“Na ka liang jong ka sorkar, ngin leh lut baroh ia kiei kei ban lap ia ka jingshisha halor ka jingkhlad noh jong kitei ki arngut ki khynnah shynrang. U Secretary ka tnad kam pohiing yn sa aiti ia ka kaiphod sha u Symbud Myntri Rangbah uba khmih ia ka tnad pohiing bad sha u Myntri Rangbah bad ngin sa shim ia ka rai” ula ong.
Haba kylli, u Bah Paul ula ong, “Nga kubur ia kaei kaba phi ong, hynrei halor kane ka jingjia ka long kaba kongsan ia baroh kiba don bynta lang ha ka imlang sahlang ba kin ai ia ki jingpyntip sha ngi. Mynta ym pat don eiei kaba kum katei. Kala jia tang halor katei ka jingjia ba arngut ki khynnah shynrang kila khlad noh, namar kane ba kala ioh ia ka jingsngewkhia kaba kadei ban ioh, hynrei ym don ka iohsngew eiei ba kum kitei ki khynnah shynrang kin ioh ia ka jinghikai bad kin shah buh ha kitei ki jaka sah na ki daw kiba phi lah dep ban kdew ia ki”.
U Myntri Sorkar ula kyntu ia baroh kiba don ia ka jingsngewkhia khamtam ia ki nongialam shnong ha ki thain nongkyndong ba kidei ban ai ia ki jingtip sha ka sorkar jylla bad sha ka tnad Social Welfare khnang ba kan ioh shimkhia ia baroh ki jingujor.
“Ngi donkam ban ioh da ka jingujor namar kumba phi lah kdew, ka lah ban don ka jingai jingbit jong ki kmie ki kpa ne ki bahaiing bahasem, ia kaba ka sorkar ka don ia ka bynta ka ba rit tam kaba ka lah ban leh, hynrei lada ki don ki jingujor kiba long thikna ba ki khynnah rit ki shah thombor na ka bynta ban pynkylla niam noh ia ki, ngin shimkhia bha ia kitei ki jingujor. Kumta ngi donkam ban ioh ia ki jingujor kiba thikna” ula ong.
