SHILLONG, MAY 1: “Ka jingpynkup burom ki nonghikai ia ka sorkar ka long ka jingsngewhun kaba khraw” la ong u Myntri Rangbah ka jylla u Conrad K Sangma hynne ka sngi Thohdieng bad ka bynrap ba ka Structured Pay Framework ia ki nonghikai SSA bad 4th Teachers kadei kaba la bishar ym haduh katno ka sorkar kan pynlut pynsep hynrei na ka bynta ban wanrah ia ka jingkylla haka jingim bad ka jingwanrah ia ka jingkmen ia ki lak ngut.
Deeply humbled by the honour from the SSA Teachers’ Association and the 4th Teachers’ Association in Shillong. The Government’s decision to introduce the Structured Pay Framework is more than a reform, it restores dignity, stability, and hope for thousands of teachers.
Recalled… pic.twitter.com/zEB3syLBj3
— Conrad K Sangma (@SangmaConrad) May 1, 2026
Ula kren ia kane ha ka jingialang shah pynkup burom, kaba la pynlong da ka Meghalaya SSA Schools Association (MSSASA) bad ka Meghalaya 4th Teachers Association ha Madan Student, Jaiaw, kum ka dak kynmaw ia ka jingshim rai ka sorkar jylla ban pyntreikam ia ka jingai tulop kaba ryntih bad ka jingai jingshngain bad ia ka jingbit jingbiang ha ka liang ka kamai kajih.
U Conrad Sangma ula sdang da kaba pynpaw ia ka jingsngewnguh ha katei ka jingialang kaba la wan ban iashimbynta da bun ngut ki nonghikai.
“Nga hap ban shim ia kane ka kabu ban pynpaw shisha ia ka jingsngewnguh ia phi baroh. Ka long kaei kaei ka bym ju jia koit khamtam eh ia ki politishan ba kin shah pynkup burom bad ngi ai khublei ia kaei kaba phi lah leh” ula ong.
“Kum ki Khristan ngi ngeit skhem ba ka jingsbun bad ka jingsngewnguh kadei kaei kaei kaba dei ban donbynta ha ka jingim briew bad nga dap da ka jingsngewkmen ba mynta ka sngi, ka Meghalaya SSA School Association ryngkat bad ka 4th Teachers Association da ki hajar ngut, Nga lah kyndit ban iohi ia ka jingbun ka jingdon jong ki nonghikai hangne” ula ong.
“Kum shi bynta jong ka kynhun myntri baroh kawei, nga kwah ban ai khublei halor ka jingpynlong ia kane ka prokram kaba shongkun” ula bynrap.
U Myntri Rangbah ula ong, ba ka dor kaba shisha jong ka jingshim ia kane ka rai ka long ba kan kynjoh sha ki longiing longsem bad sha ki samla pule.
“Ia nga shimet hi, kane ka lah ban dei kawei na ki sngi kaba da sngewhun jrut ha kine ki snem kiba la bun bha kaba nga la trei na ka bynta ki paitbah bad ban shakri ia ki paitbah” ula ong.
“Nga lah ngeit skhem beit ba ka jingsngewhun kaba khraw ia nga hi kadei lada nga lah ban wanrah ia ka jingrkhie ha ka durkhmat jong ki briew bad mynta ka sngi kila don 23000 ki durkhmat kiba rkhie kmen bad da kaba buh lang ia ki dkhot jong ka longiing longsem ka lah ban poi sha ka lak ngut kaba don mynta ka sngi bad hooid, lada ngi buh lang ruh ia ki khynnah pule kin don shuh da ki lak- lak ka jingrkhie kmen kaba ngi la lah ban pynseisoh” ula ong.
“Kane kadei ka jingsngewhun kaba shisha ia uno uno u nongialam bad khamtam eh ia nga ban iohi ba ngi la lah ban shakri bad ban wanrah ia ka jingkylla bad ban shim ia ki rai kiba eh, ki rai kaba kim long satia kiba suk ban shim” ula bynrap.
Haba pynkynmaw ia ka rai kaba la shim da ka kynhun myntri, u Sangma ula kdew halor ka bynta kaba iadei bad ka jinglut jingsep.
“Lehse jin ba ngan da lah ban pyni ia ka dur ha ka por ba ngi lah shim ia katei ka rai, phi lah dei ban iohi ia ka durkhmat bad ia ka jingkhuslai jingmut ha ka liang ka tnad pla tyngka bad ngi baroh hi ngi lah ia khuslai hynrei ka tnad pla tyngka kadei kaba la don ia ka durkhmat kaba kham khuslai shuh shuh” ula ong.
Ka sorkar kan pynlut palat T.800 Klur man la ka snem na ka bynta ban pyntreikam ia kane ka jingsam tulop kaba thymmai.
U Myntri Rangbah ula ong, ba dei ban peit ia kane ka jingpynlut jingpynsep kum kaban wanrah jingkylla kaban neh slem.
“Kane ka jingktah ia ka pla tyngka kaba ngin iaid kam dei satia kaba ngin bishar ha ka jingpynlut ia ka pisa. Dei ban bishar ha ka rukom jongka jingwanrah jingkylla ia ki jingim. Lah ban bishar ha ka bynta haduh katno ngin rah shakhmat ia ka jylla Meghalaya, lah ban bishar lyngba kumno ngin pynmih ia kiba don ia ka jingkitkhlieh, kiba la bit lah biang bad ki nongshong shnong kiba biang ha ka jylla jong ngi bad ha ka ri” ong u Sangma.
“Lada phi peit ia ka pisa bad pyrshang ban buh dor ne ban peit ia ka jingpynlut ha ka liang ka pisa ka tyngka, nga tharai ngi lah klet ia ka dur bad ngi lah klet ia ka mat, ngi lah klet ia ka jingthmu bad ia ka thong” ula ong.
“Kaei kaba ngi lah sakhi mynta bad kumno ngi lah poi ha kane mynta, kadei ka lynti iaid kaba jynjar bha. Ngi lah iaid lyngba ki jingeh, phi lah aiti lut. Phi lah iaid lyngba ki jingshitom bad phi lah iaid lyngba ki jingiakhun bad ki jingialeh” ula ong.
“Nga kmen ba nga la lah ban iadonbynta ha kane ka jingiaid lynti bad phi naduh u snem 2016 ha ka por ba nga dang long u Member of Parliament (MP) tad haduh kane ka khyllipmat kaba mynta, ha kaba ngi la lah ban poi sha ka bynta ban pynbeit ban pynthikna ba ka jingshakri kaba la ai da ki nonghikai dei ban ai jingithuh. Ka burom kaba phi dei ban ioh phi lah ioh, ka jingshngain ha kaba iadei bad ka pisa ka tyngka na ka bynta ka longiing bad kaba shimet kaba phi dei ban ioh kadei kaba lah ai” ula ong.
U Conrad Sangma ula ai ka jingiaroh ia baroh kiba la iadonbynta lang na ka bynta kane ka kam.
“Nga kwah ban ai khublei ia ka tnad pule puthi namar ba kane kan ym lah ban urlong khlem ka jingtrei shitom jong u Myntri sorkar bad ki ophisar kiba khmih ia kane ka kam. Ka jingeh kaba la don hakhmat jong ngi ka long kaba iar bha bad kumta ki sorkar kiba la leit kila shem jingeh ha kaban thaw ia ki lad ki lynti” ula ong.
“Hynrei kadei ka mon, kadei ka rai bad ka jingthrang ban wad ia ka lad ban pynbeit bad ka jingkitkhlieh bad ka jingiai bteng ban trei wat hapdeng ki jingeh kaba la pynlong mynta ka sngi ba kan long kaba lah” ula ong.
“Nga ai khublei ruh ia ki Association jong phi, ki President, ki Secretary, ki dkhot kaei kaba kila lah ban pynurlong kadei kaba donkam bha ia ka jingiaishah” ula bynrap.
Ula ai khublei ruh ia ki nongpynwandur ia ka Education Policy naduh u snem 2019 kila thaw ia ka jingiohi jngai bad ia ka lynti iaid ba kumno ka pule puthi kadei ban iaid shakhmat bad ula ai khublei ruh ia ki dkhot jong ka Education Commission.
Haba pynkut ia ka jingkren u Myntri Rangbah ula ong, “Nga kwah ban kyntu ia ki nonghikai ba ha kaba kut ka sngi hi, ka pule puthi ka long ka mat kaba iar. Nga ngeit ba por ba ka pule puthi kan kylla kadei lada ngi buh hakhmat ia ki khun jong ngi bad kylli ialade ia ka jingkylli kaei kaba bha tam ia ine i khunlung” ula ong.
“Nga ngeit ba lada baroh ki nonghikai bad ki kmie ki kpa, ki ophisar bad ki politishan ki buh hakhmat eh ia ki khunlung ha baroh ki rai kaba ki shim, ngin sa lah ban wanrah ia ka jingkylla ha ka pule puthi” ula ong.
“Ngi thrang ban iohi ba ka Meghalaya kan long kawei na ki “Top Ten States” ha ka ri. Ia katei ka jingangnud yn ym lah ban pynurlong lada ia ka pule puthi ym buh hakhmat eh” la ong u Sangma.
“Lada ka pule puthi kam iaid shakhmat, ka jingangnud ka jong ngi, ngi lah ban poi shata hynrei kan long pat ka jingangnud kaba tang shipor, ngi ngin ym lah ban pynneh sah ia ka. Kumta ka pule puthi kadei bad kan iai long beit ka bynta kaba ka sorkar kan buh hakhmat eh” ula ong.
Ha kane ka jingialang la iadonlang u Symbud Myntri Rangbah ka jylla u Bah Prestone Tynsong, u Myntri ka Pule Puthi u Bah Lahkmen Rymbui, u Commissioner & Secretary uba khmih ia ka pule puthi u Vijay Mantri bad kiwei kiwei.
