Shillong, Jylliew 27 : U MLA ka VPP na North Shillong u Bah Adelbert Nongrum ha ka sngi Baar ula ong ba ka Roster System ka don hapdeng ka jingiatakhuh mar pyrshah bad ka Reservation Policy.
“Namar ba ka Roster ka dei kaba iatyngkhuh bad ka Reservation Policy, kumta dei ban pynbeit ia ka Roster System ne pynbha iaka Resolution jongka 12.01.1972,” ong u Bah Nongrum haba leit ban ai ia ki jingpynsngew halor ka Office Memorandum (OM) jongka Reservation Roster kaba la pynmih haka 14 tarik u Jylliew 2023.
Ula ong ba ha Guideline ‘A. Quantum of Reservation’ ka OM kala shah ban bhah ia ki kam (posts) hynrei haka Resolution jongka 12 tariku Kyllalyngkot 1972, la rai halor ka jingbhah ia ki kam kiba lait, kumta ka Roster ka iatyngkhuh bad ka Reservation Policy.
U Bah Nongrum uba dei na ka seng VPP kaba don ha ka Liang Pyrshah ula dawa ba iaka kyndon “Ym dei ban ieh ia kano kano kaba thylli haka jingpyndep iaka Roster” dei ban pynrung biang noh ha ka Guidelines.
“Ha ka Guideline ‘B. Dei ban buh ryntih ha ka jingpynkhreh iaka Reservation Roster’ ha ka para B.4. ha ka essential clause “Ym dei ban don ka jingthylli haka jingpyndep ia ka Roster” la shu weng khlem kano kano ka daw” ula ong.
Ula ong ba ki jingtrei shitom jong ki tnad bad ophis sorkar, ha kine ki shi snem tam ban pynbiang ia ki jingkhein bad ki jingtip jong ka jingthungkam naduh ki snem kiba shakhmat bad ki jingtip halor ka Backlog Reserved Vacancies la dep ban ai iaka jingkhein.
“Kaei kaba jia ia kine ki jingtip? Lada ka jingweng noh ia ki clause “Ki jingkhein halor ka backlog reserved vacancies” yn hap ban pynbiang, kumta katkum ka para 2 jong ka Resolution 12.01.1972 dei ban don ia ki kyndon ban kdew ha ka Remarks Column jongka Reservation Roster, haba don kano kano ka jingpyndap ha ka Reserved Vacancy da uno uno u nongthep uba dei na kawei pat kyrdan namar ka jingbym don ia u nongthep uba biang ha katei ka snem bad ka jingpyndap ia katei ka kam kadei ban long la ka jong ha ka Reservation Roster Register,” ong u MLA.
U Bah Nongrum ula ong ruh ba ha ka District level ne Sub-Divisional level, ka jingbhah 80 percent iaki Khasi-Jaintia ym dei ban pyrkhing tang ha Jowai bad Shillong hynrei dei ban shah ha baroh kawei jongka Khasi Hills, Jaintia Hills bad Ri-Bhoi district.
