Shillong,Nailar 30 : Ka NPP bad ka BJP ki dei la la ka jong ka nongrim treikam bad ka jingiadei kam lang bad ka, ka long tang ha ka roi ka par, ong u National Vice President ka NPP bad Symbud Myntri Rangbah Bah Sniawbhalang Dhar.
Haba kren ha ka rynsan ialap elekshon ha Mawbyrtun, Mawthadraishan na ka bynta u kyrtong Dr DRL Nonglait u ban iakhun ia ka elekshon shiteng samoi ka Shillong Lok Sabha, u Bah Sniawbha ula ong ba ki paidbah kim dei ban sngewthuh bakla halor kane ka kam.
“Ka BJP ka don la ka jong ka nongrim treikam, ka NPP ruh ka don la ka jong. Ki iapher bha. Haba ngi iatreilang bad ka BJP, ka dei na ka bynta ka roi ka par, ym kiwei kiwei. Ka dei ban don ka jingshaniah ha ka Sorkar Pdeng ban wanrah ia ka roi ka par” ong u Bah Sniawbha.
U Bah Sniawbha ula kynthoh ba ki kynhun ba ialeh pyrshah kila shim kabu ia ka jingtlot ka jingmut jing pyrkhat u paidbah ban ioh ialam bakla ia ki.
“Bunsien ki paidbah jong ngi ki ju shah ialam bakla halor kae, ki pynsngewthuh bakla ia phi. Ki khmih ia ka jingtlot jong phi. Ia kane ka khubor dei ban pynphriang sha ki jaka kaba ki paidbah kim pat sngewthuh” ula ong.
Haba batai ba ka jingkyrshan ne iatreilang bad kano kano ka party kam mut ba la kylla lang, u Bah Sniawbha ula ong “Lada u Dr Nonglait u dei u Presbyterian bad ki Catholic ki vote ia u, hato kane ka mut ba ula kylla niam? Ka mut ba phi la shu ai ia ka vote. Kumjuh ruh, lada ngi iatreilang bad ka BJP kam mut ba ngi la kylla long BJP”.
Ula bynrap ba katba ka kamram jong ki nongthep vote ka long ban jied ia ki nongialam, ka dei ia ki nongmihkhmat paidbah ban pynthina ia ka kamai kajih bad ka roi ka par ka Jylla.
