New Delhi, Aug. 30: Na ka ki kti jong ki nongthain ka Meghalaya sha ka rynsan ha Bharat Mandapam, ka Ryndia kala ioh ia ka burom haba ka jylla kala rah ia kane ka jain tynrai, ka sap bad ia ka kolshor ha ka Delhi Fashion Week 2026.
Kaba la pynlong ryngkat lang bad ka Film Expo India ha ITPO, Bharat Mandapam, ka Meghalaya kala pyninam ha ka rynsan kaba long shi bynta jong ka International Reinvent Northeast Season 8, ka sienjam jongka Delhi Fashion Club ban lum lang ia ka rukom thain jain, ki jain tynrai, ki nongthain bad ki nongpynwandur itynnad bad ia ka jingriewspah kaba rim bajah hakhmat jong ki paitbah ka ri.
Ki jain kiba la pynkhreh kyrpang lyngba ka jain Ryndia na Meghalaya la thain da ka Iaineh, ka nongthain jain na Ri-Bhoi, sha ka rynsan jong ka ri ryngkat bad ka jingpynwnadur itynnad kaba leh da ka Designer na Shillong, Batkyntilin Mawthou. Kine ki jain kiba la shna kyrpang kila pynkynmaw biang ia ka rukom thain jain tynrai ka jylla ha ka rynsan pyninam da ka jingpynneh pynsah pat ia ka jinglong tynrai ka jongki.
Nalor kane, la pynbyrngia ia ki nongpeitkai da ka nongshad ka jylla ka Kanchan Chakma, kaba iadonbynta bad ka Sony Entertainment Television’s, Super Dancer Chapter 5, kaba la iaid pyninam ha katei ka rynsan.
Ka khana kaba kongsan, hi kadei shaphang katei ka jain tynrai. Ka jingpyninam kala pyni ia ka jingtbit ki nongthain ia ka rukom pynwandur ia katei ka jain bad ka jinglah ban kyntiew shuh shuh ia ki jain tynrai sha ka rynsan jong ka jingpynwandur itynnad bha, ha ka jingpyniriam, ka jingseng kam lajong bad ki lad ban pynitynnad bad pyniphuh ia kine ki jain tynrai.
Kane ka jingpyninam ka Meghalaya kala long ruh kum ka jingrakhe kaba iar ka jylla ha kaba iadei bad ka kolshor tynrai, kaba pyni ia ka jinglong tynrai ki Khasi, Garo bad Jaintia. Ka jingshad Manipuri kala pynshongkun ia kane ka jingialang da kaba wanrah sa ia kawei pat ka bynta jong ka jingpyninam ia ka kolshor ba iar ka thain ha katei ka rynsan.
Ia kane ka sienjam la lamkhmat da ka Delhi Fashion Week Founder bad President bad Celebrity Fashion Director Harshit Dhingaun, ia uba la bna nam ha Meghalaya bad ha kylleng ka thain shatei lammihngi lyngba ka rynsan Digital ka jongu “TheVOY – Voice of Youth”.
U Dhingaun baroh shi katta ula pynleit jingmut halor ka kolshor, ki briew bad ka kam jngohkai ha ka thain shatei lammihngi da kaba banjur ban ialeh ban pynpawnam shuh shuh ia ka jinglong jingman jong kane ka thain baroh kawei.
Kane ka sienjam kaba iar, la pyni ruh ia ka kamram jong ki kynthei kiba thain bad suh ia ki jain bad ki kynthei kiba sengkam dalade ha kaban pynneh pynsah ia ki jingthain tynrai ha ryngkat bad ka jingwad ia ki lad ki lynti ban jam shaphrang ha kaban leh ia kiei kiei kiba long thymmai ha ka rukom pynwandur pynwandar.
Ia ka Meghalaya, kane ka rynsan kala long kum ka lad ban pyniasoh bad ki kam thain jain bad ki iew kiba thymmai, ka jingsuh ha ka rukom pynwandur bha bad ka jingriewspah kaba naduh hyndai hynthai ha kaban iohi da ka ri baroh kawei.
Ia kane ka prokram la kyrshan bad bei tyngka da ka NEHHDC, ryngkat ka jingkyrshan ka North Eastern Council (NEC) hapoh jongka Ministry of Development of North Eastern Region (DoNER) jongka Sorkar India. Kadei ruh kaba la pyniasoh lang bad ka jingsengkam lajong kaba la mihkhmat da ka PRIME Meghalaya.
Ha Bharat Mandapam, kala dei ka pali jong ka jain Ryndia ban pynlong ia kane ka Fashion, kaba rah ia ka khana jong ka Meghalaya ha ka rynsan jong ka ri hapoh New Delhi.
