Shillong, Nailar 29 : U President barim ka Khasi Students’ Union (KSU) Bah Lambokstar Marngar ula kam ba ki Pulit kila pynngat case thymmai pyrshah ia ki laingut ki nongialam ka Central Executive Committee ba shah kem.
U Bah Lambokstar ula pynpaw ia kane hadien ka jingleit synran ia ki laingut ki nongialam ka seng ban leh medical checkup ha ka sngi Saitjain ha Civil Hospital, Shillong.
Kine ki lai ngut ki nongialam ki dei u President samla Raymond Kharjana, General Secretary Reuben Najiar, Vice President samla Pynkmenlang Sanmiet.
Haba kren bad ki nongthoh khubor, u Bah Lambok ula ong ba ka medical examination ka pyni ba ki don ki kyndon thymmai bala bynrap pyrshah ia kine ki nongialam ba shah kem.
“Kat kum ka jingsngewthuh jing ngi, haba ialam leh medical check-up, la sngewthuh ba ki don ki case thymmai bala pynngat pyrshah ia ki. Haduh mynta, ngam pat lah onghaduh katno ki case la pynngat pyrshah iakie ki nongialam ba shah kem” ong u bah Lambok.
U ong ba ka Sorkar ka lah ban bteng ha kaban pynngat ia ki nongialam ka KSU haki case thymmai, hynrei kan ym pynlong ia ka Union ban klet noh ia ki jingdawa bala buh hakhmat ka Sorkar.
“Ka Sorkar ka lah ban bteng ia ka jingkem ia ki nongialam bad ki dkhot jong ngi, hynrei ka Seng kan iai bteng ban ieng skhem halor ki jingdawa” ula ong.
U Bah Lambok ula pynshai ba ka KSU kan ym dawa ban pynlait ia ki nongialam, hynrei kan pynbor ia ka Sorkar ba kan pyntreikam ia baroh ki jingdawa bala buh hakhmta da ka Seng.
Ula bynrap ba wat ha ka jingialang ba dang shu dep bala pyniaid da u Myntri Rangbah, ka seng kam shym la dawa ban pynlait ia ki nongialam ba shah kem.
“Watla ngim pat hun 100 na ka 100 bad ki jingkular bala ai da u Myntri Rangbah, ngi sngewthuh ba kumba 70-80 % na ki jingdawa jong ngi la pynurlong da ka Sorkar Jylla” ula ong.
 Bah Lambokstar Marngar ula kam ba ki Pulit kila pynngat case thymmai pyrshah ia ki laingut ki nongialam ka Central Executive Committee ba shah kem.){kind=link}