Shillong, Nailar 29 : U MP ka NPP sha Rajya Sabha James K Sangma, ha ka sngi Saitjain ula iathuh ba ka Punjab Nationa Bank (PNB) kala kular ban pynbeit ia ka jingeh bala sahteng la slem kaba iadei bad ka jingkyntait airam na ka bynta ban shna iing, buh bynda bad ka rep ka riang sha ki paid riewlum ha ki jaka Sixth Schedule ha Meghalaya hapoh ka 60 sngi.
Ha ka kyrwoh, u James ula ong, ma u ha ryngkat u Chief Secretary Dr Shakil P Ahammed bad u Secretary (Law) Cyril V Diengdoh, kila iakynduh ia ki bor pyniaid ka PNB bala mihkhmat da u Executive Director (HR) D Surendran, Zonal Head(GM) Circle Head (DGM) bad kiwei ki Heh na ka Ophis ka PNB ha Meghalaya bad PNB Meghalaya.
“Ngi la iakren ia ka jingkyntait airam kaba la slem bha ban shna iing, buh bynda bad ka kam rep kaba la ktah ia ki paid riewlum ha ki jaka Sixth Schedule ka Meghalaya” ong u James.
U iathuh ba la pynbor ia ka PNB ba kan pynjynsur ia ki kyndon airam ka ban long kumba long kiwei pat ki public sector bank kiba treikam hapoh ka Jylla.
“Ka PNB kala ai ia ka jingkular kaba sngewtynnad ban pynbeit ia kane hapoh ka 60 snem ne kham kloi, khnang ba ki longiing riewlum kin ioh shim ram” ula ong.
U James ula bynrap ba kane ka kam kala sahteng la 18 bnai mynta bad pynpaw ia ka jingkyrmen ba ka PNB kan burom iala ka kular hapoh ka por bala buh.
 kala kular ban pynbeit ia ka jingeh bala sahteng la slem kaba iadei bad ka jingkyntait airam na ka bynta ban shna iing, buh bynda bad ka rep ka riang sha ki paid riewlum ha ki jaka Sixth Schedule ha Meghalaya hapoh ka 60 sngi.){kind=link}