Shillong, Nailar 30 : U Symbud Myntri Rangbah bad National Vice President ka NPP Bah Sniawbhalang Dhar ula ong ba ka Mawthadraishan, kaba la niew kum ka jaka ba tlot eh ka NPP, kan ai 90 % ki vote sha u kyrtong ka party Dr DRL Nonglait u ban iakhun ia ka elekshon shiteng samoi ka Shillong Lok Sabha bad kan long ka nuksa ia kiwei pat ki 36 tylli ki constituency.
Haba ialap elekshon ha Lawbyrtun, u Bah Sniawbha ula ong ba ula leit iadonbynta ha palat 1800 tylli ki jingialang elekshon ha kylleng ka Jylla bad um pat ju iohsngew ia kano kano ka jingkren kynthoh ba pyrshah halor u Dr Nonglait.
“Haduh mynta nga la leit iashimbynta ha palat 1800 tylli ki jingalang. Ym pat don kawei ruh ka jingialang kaba ong u Dr Nonglait u dei u briew bym pat biang. Wat ki riew thymmai kila ong ba ka NPP kala pynieng ia u kyrtong uba biang tam ha kane ka kynti. Kane ka dak kaba bha” ula ong.
Haba nujor ia ka jingiathep vote ka ri-lum Jaintia bad kiwei ki thain, u Bah Sniawbha ula ong “Ha ri-lum Jaintia ki don 7 ngut ki MLA bad kiba bun ki don ha ka liang synshar namar ki briew ki da pyrkhat shuwa ban vote. Kim ju vote tang namar ba bang ki sur jingrwai. Kane ka dei ka rukom ba dei ban jied ia ki nongmihkhmat”.
Ula kular ia ka roi ka par ba mar kajuh haba pynshong nongrim na ka rai u paidbah bad ong “Lada ka ri-lum Jaintia ka ai kham bun ka vote, ki ioh kham bun ki kam pynroi. Lada ka West Khasi Hills ka ai kham bun, phin ioh bun. Hynrei nga ong ha phi, kaba duna eh kumba 60% na ri-lum jaintia kin pynthikna ban jop u Dr Nonglat”.
Haba kam ba kan don ka jingkylla ha Mawthadraishan, ula ong “Ki paidbah na kane ka constituency kila ong ia nga- Ma Sniawbha, ngim dei ki NPP hynrei ha kane ka kynti kin vote ia u Dr Nonglait. Ha Bynther kaba ngi ioh tang 9-10 vote ha ka elekshon bala dep, mynta 200 ngut ki briew kila iakynduh ia u Dr Nonglait”.
U Bah Sniawbha u pyntip ba ka NPP kala pynlong haduh 30-40 tylli ki jingialang ha ka shisngi ha baroh ki 36 tylli ki constituency.
“Ma nga, Bah Prestone bad u Myntri Rangbah, ngim ju thiah. Baroh ki MLA, ki Block President bad ki MDC kila trei shitom. Ka jingjop ka dei jong ngi, hynrei ngi hap ban trei shitom” ula ong.
Ula kyntu ia ki nongthep vote ba kin ym shah ialam bakla, haba pynkynmaw ba ka NPP kala ioh tang 96 vote ha Lawbyrtun ha ka elekshon bala dep.
