Shillong, Jylliew 15 : U Myntri ka Ministry of Road Transport & Highway Nitin Gadkari ha ka sngi Nyngkong, ula pynbna ban pyntrei ia ki project National Highway ba thymmai ba shongdor kumba T.39,800 klur bad ka jingjrong ba 450 kilometer ha kylleng ka Jylla Meghalata, ia kaba la khmi lynti ba kan pynkylla ia ki lad pyniasoh ka Jylla bad pyntyllun sted ia ka roi ka par ha ka ioh ka kot.
Ula pynbna ia kane haba kren ha ka jingialang plie jong ka North East India Infrastructure Summit and Exhibition (NEIINFRA 2026) ba la pynlong ha Lariti Performing Arts Centre, Shillong.
📍मेघालय में 40,000 करोड़ की लागत वाली नई राष्ट्रीय राजमार्ग 🛣️ परियोजनाओं की घोषणा!#PragatiKaHighway #GatiShakti@SangmaConrad pic.twitter.com/g7eXPCxgxT
— Nitin Gadkari (@nitin_gadkari) June 15, 2026
Ka surok 4-lane ba thymmai ka Shillong-Silchar, kaba mang T.23,000 klur, yn sa pyntrei noh ha ka jingjrong kumba 165 kilometer bad la khmih lynti ba kan long kawei na ki jingtei kiba kongsan tam hapoh ka thain Shatei Lam Mihngi.
Kane ka surok kan pynduna ia ka por ha ka leit ka wan hapdeng ka Shillong bad Silchar da jan kumba 50% bad kan pynsted ruh ia ka leit ka wan sha Tripura, Mizoram bad Manipur lyngba ka Silchar.
Da ka pyniasoh ia ki jaka khaii pateng, ki jaka jngohkai bad ki jaka pynpoi mar, ka project la khmih lynti ba kan iarap ban kyntiew ia ka jingmih ki karkhana, ka kam jngohkai bad ka jingkynshew kam ha kylleng ka thain.
Ka surok 4-lane ba thymmai na Jorabat-Barapani, kaba mang T.8,500 klur bad kaba jrong kumba 66 kilometer, kan pynioh ia ka leit ka wan kaba sted hapdeng ka Guwahati bad Shillong. Kane ka project la khmih lynti ba kan pynduna ia ka por ha ka leit ka wan hapdeng kine ki jaka sor na ka 2.5 kynta sha kumba shikynta bad kan dei shibynta jong ka high speed Siliguri-Guwahati-Shillong-Silchar Economic Corridor.
U Gadkari ula iathuh ruh ia ka jinglong jingsam jong ka surok Darugiri-Baghmara-Dalu kaba dei shibynta jong ka NH-217, bala mang T.4000 klur bad ka jingjrong ba long kumba 136 kilometer. Kane ka project kan iarap bha ban pynbha ia ki lad pyniasoh ha ri-lum Garo bad ki shnong khappud ka Bangladesh, ka ban pynsuk ban poi sha ki iew, ki jaka sumar, ka pule puthi bad ka lad kamai kajih na ka bynta ki trai shnong.
Ula pynpaw ruh ba ki project kum ka surok Pomlum-Umtyrngar kaba dei shibynta jong ka surok Shillong-Dawki, ka jingpynbha ia ka surok Tura-Dalu, ka Tura Bypass Project, ka Pynursla Bypass Project bad ka NH-127 B project ba iasoh sha Dhubri-Jingkieng Phulbari, kan nang pynkhlain ia ki jingdon ki surok ha Meghalaya bad pynpoi ia ki lad pyniasoh sha ki shnong ba sha kyndong tam.
Kane ka summit ba arsngi kala wanrah lang ia ki nongthaw policy, ki nongialam jong ki kompani, ki nongkynshew kam, ki nongpyntrei ia ki jingtei kiba heh bad ki nongmihkhmat na ka Sorkar ban iakkren halor ki lad ki lynti bad ki jingeh ba iadei bad ka jingpyntrei ia ki jingtei, ka jingpynpoi mar, ka kam jngohkai, ka jingpyniasoh digital, ka jingkynshew kam ha ka thain Shatei Lam Mihngi. Kane ka summit ka long kum ka rynsan ban wanrah ia ka jingiatreilang hapdeng ki Sorkar bad ki kompani ban pyntyllun sted ia ka jingpynroi ha ki jingtei kiba neh bad ban plie ia ki lad ki lynti ban kyntiew ia ka ioh ka kot jong ka thain.
Ha kane ka jingialang plie jong ka NEIINFRA 2026 la iashimbynta da u Myntri Rangbah ka Meghalaya Conrad K Sangma, Myntri Rangbah ka Nagaland Dr Neiphiu Rio, Symbud Myntri Rangbah ka Nagalad TR Zeliang, Symbud Myntri Rangbah ka Meghaya Bah Prestone Tynsong bad Bah Sniawbhalang Dhar, ki Heh Ophisar ka Sorkar Pdeng bad Sorkar Jylla, ki nongmihkhmat na ki kompani bad ki nongshah khot sngewbha na kylleng ka Ri.
U Gadkari ula pynpaw ia ka jingsngew skhem ba kine ki project tei jingtei ba dang iaid bad ba dang tyrwa ban pyntrei thymmai, kin sa pynkylla dur ia ki lad pyniasoh ka Meghalaya, pyntyllun sted ia ka jingkiew ha ka ioh ka kot, plie ia ka lad iohjam iohjam bad synniang shikatdei eh sah ka thong jong ka Viksit Bharat.
Haba kren ha ka jingialang, u Conrad k Sangma ula ong b aka thain kala jam shakhmat ia ka phew snem ka jingbym don ka shong suk shongshngain sha ka juk ka jingsuk bad ka jingskhem ha ka sain pyrtgei, haba pynsngew ia ka thong jong u Myntri Rangbah Duh ba kane ka dei ka pork aba biang eh na ka bynta ka thain Shatei Lam Mihngi.
Haba kren halor ka jingkylla sted ka iohka kot ka Meghalaya, ula pynpaw ba ka Jylla mynta ka wan ha ka kyrdan ba lai hapoh ka Ri haba iadei bad ka jingkiew ka GDP ha kine ki san snem bala leit noh, kaba lam khmat da ka jingkiew arshah ka mang tyngka ka Jylla, hynriew shah ka jngkiew ha ka pynlut ha ki jingtei bad ka jingkynshew ba T.50,000 klur ha ka jingpyntrei ia ki surok. Haba kren halor ka thong jong ka Summit, ula batai ba ka thmu ban pyniatylli ia baroh ki kynhun ha kaban ia ithuh lang bad pynkylla ia ki jingeh sha ki kabu kiba kongsan.
U Myntri Rangbah ka Nagaland Dr Neiphiu Rio ula pynpaw ba ka thain Shatei Lam Mihngi kala rung ha ka jylli ba kongsan jong ki jingpynkylla kiba lamkhmat da ka Act East Policy. Haba pynpaw ia ka jingsngewnguh ia ka Meghalaya ba kala pynlong ia kane ka Infrastructure Summit ba kongsan, ula pynpaw ba kum kine ki rynsan iatreilang ki long kiba kongsan ban wanrah lang ia ki Sorkar, ki nongkynshew kam bad ki kynhun bapher bapher ban pynkylla ia ki jingiohi jngai ha ka roi ka par sha ki kam ba lah ban iohi.
