Shillong, Jylliew 15: Ka Meghalaya High Court kala kdat noh sharud ia ka POCSO Case kaba lah jan don 8 snem hadien ba kane ka khynnah kynthei kaba shem lanot bad la ka kmie, kila pyntip ha iingkashari ba ka khun kala iashong iasahlang bad u shynrang uba leh ia kane ka kam, kum ka kurim ka jongu bad kila don ruh ia ka khun kynthei kaba la don 7 snem ka rta.
Ka Chief Justice Revati Mohite Dere kala pynmih ia kane ka hukum ha ka 13 tarik u Jylliew 2026, haba tian bishar ia ka jingkyrpad u Labianglang Sumer, ban pynduh pyndam noh ia ka ejahar ne FIR No. 29(04)2018, kaba la ujor ha Lumdiengjri Police Station.
Ia kane ka ejahar la rejistar hadien ba ka kmie jong katei ka kynthei kala ujor haba ka khun jong ka kaba la don 16 snem ka rta kala punkhun.
Ki pulit kila Chargesheet bad kane ka jingtian bishar kala sahkut hakhmat jong ka Special POCSO Court, East Khasi Hills.
Ka kmie bad katei ka khun kynthei kaba shem lanot, kila leit mih hakhmat jong ka iingbishar. Ka kmie kala pyntip ha ka iingbishar ba ka khun kala im da ka jingkmen bad uba shah ujor mukotduma bad une uba shah ujor ula kyrshan ia ka bad ia ka khun.
Ka khun kynthei kala pynpaw ha ka jingshah tian bishar ba ka jingiadei ka jongka bad une u shynrang kadei da ka jingia sngewthuh jingmut bad kila ia sahlang kum ki shi kurim naduh u snem 2023.
Kala pyntip ruh ba ka khlem shim satia ia kano kano ka compensation ne bai lutksan hapoh jong kano kano ka Skhim Sorkar.
U nongiasaid aiñ uba la mihkhmat ia kane ka kynthei bad ka nongujor ula pynthikna ha ka iingbishar ba kine kiba don mamla kim don satia ia kano kano ka jingpyrshah ban pyndam noh ia ka jingtian bishar halor kane ka kam.
Ha ka hukum ba shu batai da ka ktien, ka Chief Justice Dere kala kdew ia ka hukum ka High Court ha u Lber 2026 ha kaba iadei hapdeng u Shalenbor Wahlang pyrshah ia ka Jylla Meghalaya, haba pynpaw ba ki iingbishar ha Meghalaya ki ju shim ba “Ki jingiadei da ka jingiasngewthuh jingmut hapdeng ki khynnah kaba lam sha ka jingphylliew jingieid bad jingshong kurim dang kloi ne ban iasah lang kum ki shi kurim, kadei ka bym pat pdiang da ka imlang sahlang”.
Ka iingbishar kala pynpaw ba watla ka POCSO kadei ka ain kaba kyrpang ban iada ia ki khynnah, ka jingdawa ia ka hok kam dei tang ban pyntreikam ia ka aiñ, hynrei ka dei ruh ban ai ka jingbishar kaban long ka bym shah liang, kaba sngewsynei bad ka jingsngewthuh ia ka jinglong jingman”.
Kala shem ruh “Ba kane ka kynthei kaba shem lanot bad u shynrang kila ia shong kurim ne kila iashong iasahlang kum ki shi kurim bad kila ioh khun, ban phah ia u shynrang sha phatok kan ym ai jingmyntoi ne ai ia ka hok, hynrei kan long ka jingleh ka bym shong hok ia ka kynthei bad ia ka khun”.
Da ka pynduh noh ia ka ejahar bad ia ka Special POCSO Case No. 31 jong u 2020, ka iingbishar kala bthah ia katei ka kynthei ba shem lanot ban leit mih sha DCPO, East Khasi Hills bad Secretary ka DLSA ban ioh ia ki jingmyntoi hapoh ki scheme kiba kynthup ia ka Nirbhaya Fund for POCSO Victim, Mission Vatsalya, Meghalaya Victim Compensation Scheme 2022, Ayushman Bharat-PM-JAY bad ki prokram ai jingkyrshan ha ka pule puthi.
La bthah ruh ia ka DCPO bad DLSA Secretary ban iarap ia kane ka kynthei bad ia i khun jongka ban ioh ia kitei ki lad jingiarap.
