Shillong, Jylliew 15 : U Myntri ka Ministry of Road Transport and Highway Nitin Gadkari, ha ka sngi Nyngkong ula buh ia u mawnongrim ban pyntrei ia hynriew tylli ki National Highway Project ha Meghalaya kaba kot ia ka jingkynshew ba T.3214 klur, ha ka jingialang kaba long ha madan Polo, Shillong.
📍𝐒𝐡𝐢𝐥𝐥𝐨𝐧𝐠, 𝐌𝐞𝐠𝐡𝐚𝐥𝐚𝐲𝐚 | Live from Inauguration and foundation stone laying ceremony of 6 NH projects worth ₹3,214 Cr. #PragatiKaHighway #GatiShakti #BuildingTheNation https://t.co/qnFpKrRPw1
— Nitin Gadkari (@nitin_gadkari) June 15, 2026
Ha kane ka jingialang la wan iashimbynta da u Lamphang ka Iingdorbar Thaw Ain Thomas A Sangma, u Myntri Rangbah ka Jylla Conrad K Sangma, ki Symbud Myntri Rangbah Bah Prestone Tynsong bad Bah Sniawbhalang Dhar, u MP Saleng A Sangma, ki Myntri Sorkar, ki MLA bad ki Heh Ophisar ka Jylla.
Haba kren ha ka jingialang, u Gadkari ula ong ba ka Meghalaya, kaba don ia ka mariang kaba itynnad, ka dustur ba bun jait bad ka lad ban kiew ha ka ioh ka kot, ka donkam ia ki surok kiba paka ban plie ia ki lad ba thymmai na ka bynta ka jingkiew shaphrang, ka kam jngohkai, ka khaii pateng bad ka iohkam iohjam.
Ula pynpaw ba hapoh ka jingialam u Myntri Rangbah Narendra Modi, ka Meghalaya kala sakhi ia ka jingkylla ka bym pat ju iohi mynno mynno ha ka liang ka jingpyniasoh surok.
“Ki National Highway project ba shongdor kumba T.52,400 klur kila don mynta hapdeng ka jingpyntreikam hapoh ka Jylla. Ki project ba kot kumba 820 kilometer ki dei kiba la pyndep, ki jingpyntrei ki dang iaid ia kumba 310 kilometer, katba ki project kiba kot kumba 450 kilometer kila don ha ki kyrdan bapher bapher ha ka jingplan bad jingpyntreikam” ua ong.
Bun tylli ki project kiba kongsan la lah ban pyndep ha ki snem kiba la leit noh bad kila pynjanai bha ia ka jingpyniasoh surok ha kylleng ka Jylla, ula ong.
Ula ong ba ka surok Shillong-Nongstoin-Tura Highway kala pynduna ia ka por ha ka leit ka wan hapdeng ka Shillong bad Tura, kaba long kumba 12 kynta sha ka 6 kynta. Ka surok 4-lane na Jorabat-Umiam, surok Tura-Dalu, surok Jowai-Malidor bad surok Ranikor-Baghmara kila pynkhlain ia ki lad pyniasoh ha kylleng ka Jylla bad pynsuk ia ka leit ka wan ha ki jaka khappud.
Kum shibynta jong ki jingpyrshang kiba dang iaid, hynriew tylli ki National Highway Project kiba kot ia palat 117 kilometer bad shongdor palat ia ka T.3214 klur la pynlait mynta ka sngi.
Napdeng kine ki project kiba la ai burom sha ka Ri, ka Package-I jong k surok Shillong-Dawki kala dep kumba 11 kilometer ha ka jinglut ba T.351 klur. Kane ka project kan pynbha ia ka jingpyniasoh hapdeng ka Shillong, Dawki bad ka khappud India-Bangladesh haba pynkhlain ruh ia ka kam jngohkai, ka khaii pateng bad ki kam kamai kajih.
Ka project Jowai Bypass, kaba la pyndep ha ka jinglut ba T.106 klur bad ka jingjrong kumba 5 kilometer, kala pynduna ia ka jingkhapngiah ka sor Jowai bad kala iarap shikatdei ban wanrah ia ka jingshngain ki nongleit nongwan bad kumjuh ruh ka pynsuk ha ka leit ka wan.
Ia u mawnongrim la buh na ka bynta ki saw tylli ki National Highway Project. Ka Tura Bypass Project ha NH-127 B bad NH-217, kaba don kumba 29 kilometer yn sa pyntrei ha ka jinglut ba T.952 klur. Kane ka project ka pynkynriah ia ka jing iaid ki kali na ki jaka ba bun paid ka sor Tura, pynduna ia ka jingkhapngiah bad pynsted ia ka leit ka wan sha ki jaka khappud ka Bangladesh ba don marjan ka Dalu.
Ka Durgiri–Jingkieng Phulbari sha Selsella–Simbukolgre (Package-I) jongka bynta ha NH-127B ba jrong kumba 32 kilometer, ynsa pyntrei noh ha ka jinglut ba T.737 klur. Da ka jingpyniasoh bad ka surok ban sa mih thymmai kaba pyniasoh ia ka Dhubri-Jingkieng Phulbari halor ka wah Brahmaputra, kane ka project kan nang pynkhlain shuh shuh ia ki lad pynuasih ha ka thain West Garo Hills bad pynsuk ia ka leit ka wan sha ki Jylla ba marjan.
Ka Pynursla Bypass Project ha ka surok NH-206 ba jrong kumba 8 kilometer, yn sa pyntrei noh ha ka jinglut ba T.564 klur. Kane ka bypass kan pynkylluid ia ka sor Pynursla, pynsuk ia ka leit ka wan bad pynkhlain ia ka jingpyniasoh sha Dawki, ka Um Umngot bad ka khappud Bangladesh, kaban kyrshan ia ki kam jngohkai bad ka khaii pateng ha khappud.
Kumjuh ruh, ka Package-II na Selsella-Simbukolgre sha Koiragre ba jrong kumba 32 kilometer, yn sa pyntrei noh ha ka jinglut ba T.504 klur. Kane ka project kan pynkhlain ia ki lad pyniasoh ha kylleng ka West Garo Hills.
U Gadkari ula ong ba ka surok Shillong-Dawki kaba dang don hapdeng ka jingpyntrei, kan iarap shikatdei eh ha ka jingpyniasoh bad ka Bangladesh lyngba ka khappud Tamabil, pynkylluid ia ka Upper Shillong bad pynduna ia ka por leit por wan nalor pynkhlain ia ka lad kamai kajih.
Ula pynpaw ba kine ki project kin kyntiew bha ia ka khaii ka pateng sha Bangladesh bad ka kam jngohkai ha Dawki, Dalu bad Sohra, haba aikam aijam ruh ia bun ngut nalor ka lad ia ki samla ba kin sengkam sengjam lajong.
