‘Ka khyllipmat ka jingsarong, ym ka jingleh sain pyrthei’ : Ong u CM ba pynieng i’u President ka KAS ha ka Shillong LS Election

Shillong, Jymmang 06 : U Myntri Rangbah ka Jylla Conrad K Sangma ha ka sngi palei, ula kyntait ban pdiang ia ki jingkren ba ka rai jong ka NPP ban pynbna ia u President ka Khasi Author Society (KAS) Dr DRL Nonglait kum u kyrtong sha ka elekshon shiteng samoi ka Shillong Lok Sabha, ka dei ka jingpyrshang ban pynlong kam sain pyrthei ia ka jingdawa ithuh ia ka ktien ka Khasi bad Garo bad shim pynban ba ka dei ka “khyllipmat ka jingsngew sarong” bad ka sienjam ban iada ia ka jinglong kyrpang ki riewlum.

“Kata ka dei ka jingiohi jong ki. Lehse phi tharai ia ka ha ka rukom kaba bakla hynrei ha gi ngi khmih ia ka kum ka khyllipmat ka jingsngew sarong, ngi khmih ia kane kum ka kabu ia ngi ban wanrah ia ki jingmut jingpyrkhat jong ngi, wanrah ia ki mat treikam jong ngi bad wanrah lang ia ki thong jongngi bad ban iatreilang kum ka kynhun ban kynjoh ia kajuh ka thong bad kajuh ka jingthmu kaba ngi baroh ngi la pyrshang ban kynjoh bad ban lah pynthikna ba ngin pynneh pynsah ia ka jingithuh kyrpang jong ki jaidbynriew riewlum jong ka Jylla jong ngi bad ngin leh kat kaba dei ban iada ia ka bad sumar ia ka” ong u Conrad haba iakren bad ki nongthoh khubor hadien ka jingialang ka party.

Ula ong ba ki kam bala leh da u President ka Khasi Author Society (KAS) ki iahap bha bad ki jingthmu jong ka Sorkar.

“Kane ka dei kaba u Dr Nonglait ula leh baroh shi jingim bad jingtreikam ban iada ia ka. Kane ka dei ka jingthmu jong ka Sorkar bad ngi sngew ba ka dei ka jingiasnohlang kaba biang eh bad ka jingiatreilang kum ka kynhun kaba biang eh ba ngin lah ban pyntyllun shakhmat ia ki jingsngewkhia jong ngi, ia ka kyrdan jong ngi, ka thong bad ka jingiakhun jong ngi khnang ban gin lah ban kynjoh ia ki thong bapher bapher” ong u Myntri Rangbah.

Haba kylli la ka jingkiew ka VPP bad ka jingioh vote isynei kan buh ka jingeh ia ka NPP ha ka elekshon MP shiteng samoi, u Conrad ula ong “Ym don satia kino kino ki elekshon kiba lah ban shim sting”.

“Baroh ki elekshon ki long kiba eh. Nga ju bat beit ia kane naduh ka sngi ba nyngkong haba phi kylli ia nga ia kano kano ka jingkylli halor kano kano ka elekshon. Ngim ju shim sting ia kano kano ruh, Ha ngi, man ki seng sain pyrthei kiban iakhun ki dei ki bor ba hap tynjuh ia ngi, kane ka dei kumno ngi pynkhreh ialade bad ngin pynthikna ba ngin leh kat kaba lah bad ngin trei shitom khnang ban gin jop ia kane ka elekshon Lok Sabha” ula ong.