Shillong, Jymmang 07: U Symbud Myntri Rangbah ka tnat kam pohiing (Police) Bah Prestone Tynsong u la ong ba ka Sorkar Jylla ka la ujor sha ka Iingkashari Meghalaya High Court pyrshah ia ka hukum jong ka iingbishar ka District ba ai jamin ia ka Sonam Raghuvanshi, kaba dei ka nongshah kynnoh ba hakhmat eh ha ka jingpyniap iala u lok na Indore, u Raja Raghuvanshi.
“Ia mynta hi, ngam dei ban kynthoh ia kata namar ngi la dep ban ujor sha ka iingbishar sha Meghalaya High Court. Kumta, ai ba ka iingbishar kan rai namar ba ngi iakhun pyrshah ia ka jamin ba la ai da ka iingbishar ka District, to ngin ia ap bad peit aiu ka iingbishar kan ong” ong u Bah Prestone.
Haba ïada ïa ka jingtohkit jong ki Pulit, u Bah Prestone ula ong, “Em, ha ka jingshisha na ka liang jong ngi, ngi la pyrshang katba lah, phi la iohi wat ki Police Ophisar bad ka Special Investigation Team (SIT) ne mano mano ruh, ngi la pynkhreh bha.”
“Ha kaba ïadei bad ka jingpynïaid ïa kum kine ki mukotduma, phi tip ïa ki rukom treikam, ki kyndon kiba hap ban bud. Kumta kam don kum kata ka jingbakla na ka liang ki pulit bad kumba nga la ong, ha ka ïingbishar ka ju jia ba kawei ka ïingbishar ka lah ban ai jamin, kawei pat ka ïingbishar ka lah ban pynsangeh ïa ka jamin, kumta ka ïingbishar kan sa rai,” u la ong.
Ha ka 27 tarik Iaiong, ka Iingkashai Magistrate ka la ai jamin ia ka Sonam Raghuvanshi, kaba dei ka nongshah kynnoh ba hakhmat eh ha ka jingpyniap iala u kurim, u nongkhaii na Indore (L) Raja Raghuvanshi ha Sohra, hadien ba ka la rai ba ki pulit kim shym la lah ban pyntip bha ia ki nongrim bala kem ia ka.
Ka iingbishar ka la kdew ia ki jingbym iahap kiba paw ha ki kot ki sla ban kem iaka.
Ka FIR ha Sohra PS Case No. 7/2025 la register katkum ki kyndon 103(1)/238(a)/309(6)/3(6) jong ka BNS, ka “Intimation of Grounds of Arrest” kaba la ai sha ka Sonam ka la kdew ïa ka kyndon 403(1) ha ka jaka jong ka 103(1).
Ka nongbishar kala kyntait ïa ka jingkynthoh jong ka liang pynngat shaphang ka jingbakla pyndap haki kot, da kaba kdew ba kajuh ka jingbakla ka la paw ha ki kot ki sla kiba bun.
