Shillong, Iaiong 29: Ka jingsam ia ka LPG bad ia ki mar Petroleum ha Meghalaya ka long kaba biang bad ka don ruh ka jingbuh lypa ‘Stock’ bad ka jingsam ka long ka bym don jingthud eiei, la ong ki ophisar jong ki Oil Marketing Company bad ka Sorkar Jylla ha ka jingiakren bad ki nongthoh khubor hynne ka sngi Balang.
Ia kane pynpaw da u Sashwati Mudoi, State Level Coordinator, Oil Marketing Companies (OMC) Meghalaya, Amarjyoti Bordoloi, Chief General Manager, IndianOil AOD State Office bad u Bah Shai Kupur War, OSD, Food Civil Supplies Department ka Sorkar Meghalaya. Ia kaba la pynlong da ka PIB Shillong ryngkat ka jingiatreilang bad ka Department of Food, Civil Supplies & Consumer Affairs.
Ki ophisar kila pyntip ba ka jingsam ia ka LPG bad ia ki mar Petroleum kaba kynthup ia ka petrol bad diesel, ha ka jylla ka long kumba ju long bad kaba don hapoh ka jingkhmih kaba biang.
“Kala don ka jingbuh lypa kaba biang bha bad kan ym don kano kano ka jingthud ha ka rukom sam haba pynthikna ba ka rukom treikam ka long kaba ryntih, ka jingiai bteng ban khmih bniah bad ka jingiatrei ryngkat kaba biang hapdeng ki OMC bad ka sorkar jylla”.
Ka Meghalaya ka don 334 tylli ki Retail Outlet ne ki jaka die ia ka Petroleum, 205 tylli jongka Indian Oil, 43 tylli jong ka Bharat Petroleum, 72 tylli jongka Hindustan Petroleum bad 14 tylli ki dukan shimet ne Private Outlet. “Ka jingdon ka long kaba lah dap ia kaba yn lah ban pynbiang haduh 25 sngi kiban wan bad 46 sngi ia ka jingdawa ia ka diesel” la ong kine ki ophisar.
“Baroh kitei ki jaka die kila treikam kumba ki ju long khlem kano kano ka jingteh ia ka rukom die bad ka rukom thied ruh ka long kaba biang kumba ju thied hi baroh shi katta ha u bnai Kyllalyngkot bad Lber. Kila kyntu ia ki nongshong shnong ba kim dei ban sheptieng ne ban leit thied shuh shuh” kila ong.
Ha kaba iadei bad ka LPG, ka jingshakri kala kynjoh ia kumba 3.7 lak ngut ki nongshim Gas lyngba ki shnad jong ki 66 tylli ki nongsam ne Distributors kiba odn ha kylleng jong kane ka jylla”.
“Kala don ka jingbuh lypa kaba biang ia ki LPG Cylinder ban shet jingshet ha iing bad kam shym la don kano kano ka jingkyrduh ia kaba yn ioh pdiang. Kumba ka long, man la ka sngi la sam 4,103 tylli ki LPG bad hadien ka 5 sngi la pyndap biang ia ki katkum ka jingpan lypa ne Booking”.
Ka jingpyndonkam da ki kor Digital kala kiew bha.
Ki ophisar kila pynpaw ba kala don ka jingkiew bha ha ka jingpyndonkam ia ki kor Digital, ha kaba 83 percent na ka jingpan ne Booking ia ka LPG kadei kaba la leh lyngba ki rynsan Digital ha ba ianujor bad ki 2 bnai kiba la dep kaba la long tang 68 percent. Ka jingbud ryntih ia ka Delivery Authentication Code (DAC) ruh kala long kaba biang bha kaba la kynjoh sha ka 67 percent na ka 36 percent ha ki 2 bnai kiba la dep, kaba pynthikna ia ka rukom treikam kaba khuid ba suba bad kaba tehlakam ba kan ym don ka jingphah kylla shawei.
Hapoh jongka Pradhan Mantri Ujjwala Yojana, “Kumba 1.7 lak ngut ki nongioh jingmyntoi ha ka jylla kidei kiba la pynshlur ban pyndep ia ka eKYC khnang ba kin lah ban book lypa lyngba ka rynsan Digital bad ka jingpynshisha ba la dep wan pynpoi”.
Ki nongsam kila leit ruh ha man la ki iing ban pynsngewthuh halor kane ka bynta.
“Ka jingleit pyndap biang man la ka sngi ia ka PMUY kala long kumba 1,942 ha u bnai Lber 2026.”
Ban kyrshan ia ki longiing kiba pyndonkam duna, ki nongtrei bylla bad ia ki samla pule “Lah sdang pyntreikam da ki 5 kg LPG Cylinder, ha kaba la dep ban die haduh 4,878 tylli haduh u Lber 2026 bad 4,780 tylli haduh ka 1 tarik u Iaiong 2026.”
Ki Ophisar kila iathuh ruh ba ka Commercial LPG kadei kaba kila sdang ban pynneh kaba la kot 70 percent kaba iaid ryngkat bad ki kyndon jingbthah jong ka Sorkar India, ha kaba la buh hakhmat ban pynbiang ia ki jaka kiba kongsan kum ki hospital, jaka pule, ki jaka jong ki bor shipai, railways, ophis sorkar, hotel, restaurant bad ki jaka bam jong ki karkhana.
Kila iathuh ba ka jingpyniar ia ki Piped Natural Gas Network ka dei ka kam kaba la shimkhia da ka Indradhanush Gas Grid Limited (IGGL) ban pynduna ia ka jingshaniah ha ki LPG Cylinder ha ka thain sor.
“Ki jingpyrshang kila nang iaid shakhmat ban kyntiew ia ka jingsam ia ka bor da kawei pat ka tyllong kaba kynthup ia ka jingpyniar ia ka CNG, ia kaba mynta la lah ban ioh na ki 52 ki Retail Outlets ha kylleng jong ka jylla”.
Ha kaba iadei bad ka jinglong jingman ha ka thain shatei lammihngi.
U Bordoloi ula ong, ba ka thain shatei lammihngi “kala pynmih kumba 60-70 percent ia ka jingdonkam ia ka LPG lyngba ki karkhana saiñ kiba don ha ka thain bad ka jingpynmih mynta kala kot sha ka 1,400-1,500 metric ton na ka jingdonkam kaba 2,700 metric ton ha ka shi bnai”.
Ula bynrap ba “Ia ka LPG Bottling Plant la sdang ban tei ha Ri Bhoi bad la khmih lynti ba kan sdang treikam noh ha ka aiom synrai jong une u snem, kaban nang pynkhlain shuh shuh ia ka rukom sam gas ha ka jylla”.
“La pynlong man la ka por ia ki jingialang da ka Sorkar, Civil Supplies Department, ki OMC bad ki district-level monitoring committee ban khmih bniah ia ka rukom shalang bad jingsam. La aiti ruh man la ka sngi ia ki jingtip halor ka jingbuh lypa ne Stock sha ka State Control Room ban pynthikna ia ka jingkhmih bniah ha ka por kaba shisha”.
“Ban tehlakam ia ka jingdie tuh bad ka jingpyllait be-aiñ shawei, la shim ia ki sienjam hapoh jong ki kyndon ka Essential Commodities Act, 1955 bad la shim ia ki sienjam kiba tyngeh pyrshah ia ki nongsam kiba pynkhein ia ki SOP, kynthup ia ka Digital Booking bad ia ki kyndon jong ka jingpynshisha ba la dep ban wan pynpoi”.
Ka Sorkar Meghalaya bad ki Oil Marketing Company kila pynthikna lang ia ki nongshong shnong ba kala don ka jingbuh lypa ia ka LPG bad ia ki mar Petroleum bad ka jingsam ruh ka long kaba iaid ryntih.
La kyntu ia ki nongshong shnong ba kin shaniah ha ki jingpyntip ne jingpynbna na ki ophisar, ban kiar ka jingpynsaphriang ia kino kino ki hamsaia, ban pyndonkam ia ki rynsan digital ban pan lypa ne Book ia ki LPG bad ban leh ia ka bynta ban pyndonkam bad ban nang ban tyngkai.
