Shillong, Jylliew 10 : U Nongialam ka BJP bad MLA ka Pynthorumkhrah Bah AL Hek ha ka sngi Balang ula kyntu ia ka Sorkar Jylla ba kan pynlong ia ka jingkhmih bniah ia kaei kaba lah ban leh bad ka bym lah ban leh hashuwa ban pyntrei kam ia ka Inner Line Permit (ILP) bad ka Meghalaya Residents Safety and Security Act (MRSSA) ha Jylla.
Kat kum ka jingong jong u, kano kano ka ain ka dei ban pynbiang tarajur ia ka jingmyntoi jong ki trai nongshongshnong bad kito kiba wankai sha ka Jylla.
Haba kren sha ki nongthoh khubor, u Bah Hek ula ong ba ka jingphaikhmat ka dei ban long halor kaei “kaba lah ban leh” bad ki jingmyntoi ia baroh ki kynhun bapher bapher.
“Haba iadei bad ka ILP bad MRSSA, Nga kyrpad ia ka Sorkar Meghalaya bad ki paidbah ka Jylla bah aba ngi kwah ban pyntreikam ia ka ILP lane MRSSA ha Meghalaya, nyngkong ngi dei ban khmih ia kaei kaba lah ban leh. Kaei kaba lah ban gin leh bad kaei kaba ngim lah ban leh” ula ong.
Ula bynrap ba ka jingpyrkhat ba nyngkong eh ka dei ban long ia ka bha ka miat jong ki paid nongshongshnong ka Jylla, haba pyrkhat ruh ia ki briew ba nabar, khamtam ki nongjngohkai.
“Kumta, ka bynta kaba lah ban leh ka dei ban long ka jingmyntoi ia baroh ki briew, ym tang ia ki nongshongshnong ka Meghalaya. Nyngkong ngi hap ban khmih ia ka jingmyntoi jong ki paidbah ka Jylla bad ruh, ngi hap ban khmih ia ka jingshngain bad jingmyntoi jong ki briew kiba wan sha Jylla khamtam ki nongjngohkai” ula ong.
Haba kylli ia ka lynti ba shakhmat, u Bah Hek ula kyntu ban pynlong ia ka jingwad bniah kaba janai bha ban pynthikna ba kano kano ka ain kam dei ban ktah ia ki nongshongshong ba rit paid ka Jylla lane pyrrkhing ia ki nongwankai.
 bad ka Meghalaya Residents Safety and Security Act (MRSSA) ha Jylla.){kind=link}