Rakhe ka BJP ia jingdap 12 snem ka Sorkar u Modi da ka jingialang buh jingduwai

Shillong, Jylliew 10: Ka Bharatiya Janata Party (BJP) Meghalaya ha ka sngi Balang, kala pynlong ia ka jingbuh jingduwai jong baroh ki niam ne ka All-Faith Prayer Meet kum ka dak ban rakhe ia ka jingdap 12 snem jong ka Sorkar Pdeng kaba la ialam da u Narendra Modi.

Kane ka pyni ruh ia ka dak kaba ka ong ba ka dei kaba wanrah ia ki jingkylla, ka roi ka par ha baroh ki bynta, ka jingkiew sted ka ioh ka kot, ka shongsuk shongsain bad ki kam pynroi kiba phaikhmat na ka bynta ka thain Shatei Lam Mihngi.

Ia kane ka jingialang la pynlong ban ai burom ia ki jingkylla kiba la wanrah da ka sorkar pdeng bad ia ka thong jong u Myntri Rangbahduh ka ri ban pynlong ia ka ri India kaban kiew shaphrang hapoh u snem 2047.

“Ha kine ki 12 snem kiba la dep u Myntri Rangbahduh ka ri Narendra Modi uba la ialam ia ka sorkar BJP ha ka sorkar pdeng kala long ka jingiathuhkhana jong ka jingwanrah ia ka jingkylla, ka jingkiew ka roi ka par ha kylleng ki bynta, ka jingkiew sted jong ka ioh ka kot, ka jingsuk bad ki mat kam pynroi kiba la phaikhmat na ka bynta ka thain shatei lammihngi kaba long kaei kaei kaba shisha ia kaba ym pat ju jia” la ong ka BJP.

Ia kane ka prokram la sdang da kaba rwai ia ki jingrwai niam Khristan bad la pynbud pat da ka jingbuh jingduwai na ka Niamtre kaba la ialam da ka Kong Sumitra Laloo. La ioh ruh ia ka jingpule na ka Quran bad ka Sanskrit Hindu Shlokas.

U Chief Spokesperson u Bah Mariahom Kharkrang ula pynkut ia kane ka jingialang da kaba pule ia ki dkhot na ka Bible.

Ka BJP kala ong, ba ka jingbuh jingduwai ka long ban kyrpad ia ka jingiai bteng ban kiew shaphrang ka ri hapoh ka jingialam jong kane ka sorkar kaba mynta.

“Baroh ki jingduwai kidei da ka jingthmu ba u Blei nongbuh nongthaw un theh ia ki jingkyrkhu ia u Myntri Rangbahduh ka ri, ia ka sorkar bad ia ki paid nongshong shnong ka ri India khnang ba ka ri kan kiew shaphrang, kan sngewbha da ka jingdon ia ka sorkar kaba skhem bad ba kan ieng ha khlieh eh jong ki kynhun jong ki ri hapoh ka jingialam ba tbit jongu Narendra Modi.

U MLA ka BJP u Bah AL Hek, u President ka BJP Meghalaya u Rikman G Momin bad u Sagar Rayka u National Vice President jongka BJP OBC Morcha bad MP barim kila wan ban iashimbynta ha kane ka jingialang.