Shillong, Naitung 28 : Kum ka jingkyntiew kaba khraw ia ka kamai ka kajih ki nongrep diengjri, u Myntri Rangbah ka Jylla Conrad K Sangma ha ka sngi Nyngkong, ula plie ia ka Centrifuged Latex Manufacturing Unit (karkhana sain jri) ba nyngkong eh ka Jylla, ha Koksi Nengsat kaba hap hapoh ka Songsak C&RD Block.
Kane ka karkhana kaba dei kaba ar hapoh ka thain Shatei Lam Mihngi-ka pyni ia u mawjaw ha ka jingpyrshang jong ka Jylla ban kyrshan ia ki nongrep bad kyntiew ia ki nongsengkam sengjam.
Ia kane ka karkhana la pyniaid da ka Sister Rose, ka nongseng jong ka Mendipathar Multipurpose Cooperative Soceity (MMCS) bad bei tyngka haduh T.18.8 klur lyngba ka Meghalaya Basin Management Agency, ka project ka ban ai jingmyntoi ia kumba 3000 ngut ki nongrep diengjri ha kylleng ka Ri-lum Garo.
“Ka karkhana kan dei ka jingkyrkhu ia ka Ri-lum Garo bad ka Jylla baroh kawei, naba kan ai jingmyntoi ia kiba bun bah ki nongrep kiba don bynta ha ka kam rep diengjri” ong u Conrad.
“Naduh ba ka Sorkar jong ngi kala shimti ban synshar ha u 2018, kaba hakhmat eh ka long ban sngewthuh ia ka jingeh jong ki nongrep jong ngi bad ban ai ia ki lad jingiarap ki ban kyrshan ia ki. Ki prokram kum ka Focis, Focus+ bad CM Farm+ ki dei shibynta jong kane ka thong” ula ong.
U Myntri Rangbah ula kdew ruh ba ki nongrep diengjri kila shah khnoit la slem bha ha ki nongkhaii kiba wan nabar jong ka thain. “Kane ka karkhana kan pynkylla noh ia kane, bad kan tyrwa ia ka dor ka mur kaba long kat kum ka iew bad kan pyllait ruh ia ki nongrep na ka jingpynsyrwa ia ka por” ula ong haba kyntu ia ki nongrep diengjri ba kin die ia ki mar jong ki beit beit sha kane ka karkhana.
Haba ban jur ia ka jingkongsan kine ki project ha ka ioh ka kot, u Myntri Rangbah ula ong “U Myntri Rangbah Duh ula buh ia ka thong ban kyntiew arshah ia ka kamai kajih ki nongrep. Hynrei hangne ha Meghalaya, ngi hap ban pynheh shuh shuh ban ia ka arshah, haba khmih ia ka jingshaniah tylli ha ka kam rep. Ban kynjoh ia ka thong $10 billion ha ka ioh ka kot, ngi hap ban pynkhlain ia ka kamai kajih bad ki lad ki lynti ia ki nongrep”.
U Conrad ula pyntip ruh ba 40 tylli kum kine ki karkhana kin sa mih hapoh ka Jylla ban kyntiew ia ka ioh ka kot jong ki nongrep bad pynduna ia ki jingduhnong. “Ki kam Sorkar kila dap lut. Ngi donkam ban pynshlur ia ki samla ban shim ia ka lynti ban sengkam sengjam lajong. Lyngba ka Cm Elevate, ngi la kyrshan ia ki nongsengkam hapoh ka Jylla” ula bynrap.
U Myntri Rangbah ula buh ruh ia u maw nongrim jong ka Fruit Dehydration Unit ba nyngkong eh ka Jylla. Kane ka project ba T.23 klur, kan sa dep ha u bnai Naiwieng jong u snem ban wan bad kan pynmih haduh 7,400 MT u soh manla u snem, ka ban ai jingmyntoi ia palat 5000 ngut ki nongrep lyngba ka jingthikna ba kin lah ban die ia ki mar, ka dor ka mur kaba kham bha bad ka jingai kam aijam.
Ha kine ki jingialang la iadonlang u Myntri ka tnad PHE Marcuise Marak, MLA Marthone Sangma bad ka Sister Rose, Secretary ka MMCS.
 ba nyngkong eh ka Jylla, ha Koksi Nengsat kaba hap hapoh ka Songsak C&RD Block.){kind=link}