Shillong, Naittung 28 : Ka Iingkashari Meghalaya High Court kala pynwai noh ia ka mukotduma Public Interest Litigation (PIL) ba iadei bad ka jingpynkynriah ia ki nongshong dukan madan bala ioh licence sha ka jaka shong dukan madan bala buh da ka Sorkar ha ka thain Khyndailad.
Kane kala mih hadien ba la pyntip sha ka Iingkashari ba ka Sorkar kala pyndep ia ka jingpynkynriah ia ki nongshong dukan madan hapoh ka tarik bala buh ka 22 tarik Naitung.
“Naba ia ka thong la lah ban pyndep, ym don eiei shuh ban shong bishar ha kane ka aplikeshon” ong ka Division Bench ba kynthup ia u Chief Justice IP Mukerji bad u Justice W Diengdoh ha ka hukum bala pynmih ha ka sngi Nyngkong, haba pynwai noh ia ka MC (PIL) No.2 of 2025.
“Ka kam jong kane ka aplikeshon ka long na ka bynta ban pynkylla ia ka hukum ba hashuwa jong ngi kaba ai katto katne por ia ki nongshong dukan madan ba don licence ba kin shong dukan ha Police Bazaar. La pyntop ba kane ka jingbuh por kala ktah ia ka kamai ka jong ki. Namar kata, ngi la pynkiew ia ka por ba ailad ia ki ban shong dukan ha ka thain” kala ong.
U Nongiasaid jong ki nongmudui ula pynpaw ia ka jingsngewkhia halor ka jingpynduh noh ka bym shonghok ia ki licence jong ki katto katne ki nongshong dukan madan, kaba la khang lad ia ki ban ioh jaka shawei.
Ka Iingkashari kala rai ba sa bishar ia kiwei pat ki kam ba mih thymmai, kynthup ka jingpynkynriah ia ki nongshong dukan madan na ki jaka ba bun paidbah bad ka jingkyndang ia ki nongshong dukan madan ki bym don licence, ha ka PIL ba pura la 5 tarik Nailar, 2025.
“Ki don katto katne ki kam ba mih thymmai kum kaba la pynsngew da u Yobin haneng bad ka jingkylli halor ka jingpynkyn riah ia ki nongshong dukan madan bala don licence na ki jaka ba bun briew sha ki jaka ba buh da ka Sorkar bad ka jingkyndang ia ki nongshong dukan madan bym pat ioh licence na kito ki jaka nalor kiwei kiwei, yn sa shong bishar ynda ngi la khot bishar biang ia ka PIL la 5 tarik Nailar, 2025” ong ka hukum.
 ba iadei bad ka jingpynkynriah ia ki nongshong dukan madan bala ioh licence sha ka jaka shong dukan madan bala buh da ka Sorkar ha ka thain Khyndailad.){kind=link}