Jowai, Naitung 28 : Ka jingiakynad hapdeng ki paid Karbi bad ki Pnar ha Lapangap, kala bteng biang ha ka sngi U Blei, kaba la wanrah ia ka thma siat jri kaba neh haduh shikynta shikynta tam.
Kane ka jingjia kala jia hynnin ka Sngi U Blei bad la kynnoh ba kane ka jingiakynad kala sdang na ka jinghiar thma ki paid Karb ia ki nong Lapangap kiba leit jngoh ia ki lyngkha kba.
U Waheh Chnong ka Lapangap u pyntip ba kane ka jingsiat ki Karbi da ki jri siat sim ia ki nong Lapangap kala jia mynta la 2-3 sngi bad hynnin ka sngi U Blei, kala mih ka jingialeh markylliang.
U pyntip ba kane ka jingiasiat jri kala neh haduh 60 minit eiei (shikynta) haduh da wan ki Pulit na baroh arliang ban tehlakam.
Ka Dorbar Shnong Lapangap kala dawa ba dei ban weng noh mardor ia ka ktem ki Pulit ka Assam na Lapangap bad ban buh noh da ki CRPF ban iada ia ki nongshongshnong.
