Agartala, Nailar 30: Haba shong ha ka sorkar ar enjin lane ka sorkar kaba synshar ha ka jylla bad ka sorkar pdeng (Double Engine Government) kaba jop, ka BJP kan wanphai biang ha ka bor hadien ka ilekshon assembly ha u 2023, kata da ka jingjop ka ban long palat ar shah ha ka jingbun paid, ong u national president ka BJP, u J.P. Nadda hynnin ka sngi Nyngkong, kata hadien ki jingialang bad ki nongialam kumjuh bad ki kynhun seng jong ka BJP.
U Nadda uba la wan poi ha Tripura ha kane ka sngi U Blei ba la lah ha ka jingwan jngoh ba ar sngi kynthih ban pynkhreh na ka bynta ka ilekshon assembly ka ban wan, u la ong ba hadien 35 tylli ki snem jong ka jingsynshar ba pulom jong ka sorkar CPI-M, ka sorkar BJP hadien ba kala wan ha ka bor ha u 2018 kala shim ia ki sienjam ban kyntiew pat ia ka ioh ka kot bad ka roi ka par bad ban pynneh pat ia ka shongsuk shongsain.
“Ki jingpynlong ia ki pakhang shnong, pakhang surok, ki kam ia umsnam sain hima bad lyngba ki kam lehnoh kila sangeh ha ka por jong ka sorkar BJP,” kam u Nadda.
Kane ka jingwan jong u Nadda sha Tripura ka long ruh kaba kongsan na ka bynta ban khring ia ki vote jong ki paid nongshong shnong kiba dei ki trai shnong riewlum (Ka Tripura ka don haduh 20 tylli ki seat ba la bhah kyrpang na ki 60 tylli ki seat), ha kaba ula iakynduh ruh ia ki nongialam jong ki trai shnong, ki MLA trai shnong, ki nongialam ka kynhun synrop BJP, ka Indigenous People’s Front of Tripura (IPFT) kumjuh ia ki dkhot jong ka Tripura Tribal Areas Autonomous District Council (TTAADC).
Haba ai jingkren ha ka jingialang paidbah hapoh ka headquarter ka TTAADC ha Khwumlung (ka thain kaba bun ki trai shnong),kumba 20 km na Agartala, u Nadda ula ong ba dei tang ka seng BJP kaba lah ban kyntiew ia ka ioh ka kot bad ka roi ka par ha ki jaka shong shnong jong ki trai shnong riewlum, bad ba ka BJP kan rah ia ki trai shnong sha kawei pat ka bynta jong ka jingim kaba kham biang.
Ban pynshai kumno ba ka BJP ka pynleit jingmut kyrpang na ka bynta ka roi ka par jong ki trai shnong riewlum, u Nadda u la ong : “Lyngba ki sienjam kiba ka seng BJP ka la shim, la jied ruh ia ka president kaba dei ka kynthei riewlum ha ka sien kaba nyngkong ha India na ki nongshong shnong kiba dei ki riewlum.Ula ong ruh ba kila don haduh phra ngut ki myntri hapoh ka kynhun myntri ka sorkar pdeng kiba dei ki trai shnong riewlum bad san ngut ki myntri kiba dei ki riewlum hapoh ka sorkar Tripura.
Da kaba shim ia ka jingkren jong u Myntri Rangbah (CM) ka Tripura u Manik Saha bad u CM barim u Biplab Kumar Deb uba la don lang ha ka jingialang bad ki lad pathai khubor kumjuh ha ka jingialang paidbah, u Nadda ula ong ba ia ka “Vision Document-2018” la dep lypa ban pynurlong.
Haba pynpaw halor ki jingjop jong ka sorkar BJP hapoh ka sorkar pdeng bad ka jylla, ula ong ka Tripra mynta kala kiew ha ka liang ka ioh ka kot bad ka shongsuk shongsain ruh kala wanphai biang ha ka jylla.
