Aiti ka SIT iaka Chargesheet khlem da jer kyrteng ia ki 39 ngut ki Ophisar
Guwahati, Jylliew 27 : Ka Iingkashari u Special Judge, Assam ha ka sngi Balang, kala kyntait ban pdiang ia ka chargesheet bynrap bala aiti da u Ophisar IPS Prateek V Thube, kaba tohkit ia ka jyrsieh thungkam da kaba siew pisa hapoh ka Assam Public Service Commission.
Ka Iingkashari kala bthah iaka Special Investigation Team (SIT) bala khlieh da u Additional DGP (CID) Munna Prasad Gupta ba kan nang phah tohkit shuh shuh ia kane ka kam da u Ophisar uba bat ia ka kyrdan ym hapoh ka kyrdan DySP.
U Thube ula aiti ia ka chargesheet bynrap pyrshah ia saw ngut ki Ophisar ba kyrteng u Sukanya Das, Wahida Begum, A Nanda Bau Singh bad Rakesh Das myn ha ka 20 tarik Jylliew. Baroh kine ki Ophisar ki dei kiba la don ha ka jamin.
Ka SIT kala pynlong ia ka jingtohkit pyrshah ia ki 39 ngut ki Ophisar kiba la shah jied ban long ki ACS bad APS bad kiwei ki Gazette Ophisar lyngba ka Combined Competitive Examination (CCE) bala pynlong da ka APSC ha u snem 2013 bad 2014.
Napdeng kine ki 39 ngut ki Ophisar, 32 ngut ki dei jong ka batch 2013 bad 7 ngut ki dei jong ka batch 2014.
“Ka SIT kala khot hajir ia ki, tohkit ia ki bad shim jingthoh ia ki jingbatai jong ki. Kumta ka SIT ka dei ban lah shim rai halor ka jingtohkit bala pynlong ia ki. I aka kyrteng jong ki dei ban pynpaw ha ka column 10 lane 11” ong u Special Judge ha ka hukum.
“Namar ka SIT ka khlem pynmih ia ka kyrteng jong kine ki briew ha ka chargesheet, ka long kaba eh ia ka Iingkashari ban shim rai halor ka case pyrshah ia ki. Ka paw ba ha ka por ba tohkit, ka SIT kala tohkit ia katto katne ki briew bad kurup ruh ia katto katne ki kot ki sla. Ki jingehm jong u IO haduh mynta pyrshah ia ki 39 ngut ki Ophisar ka long kaba sngewkhia bha bad kaba pynkyndit ruh ia baroh” ong ka Iingkashari.
