Shillong, Jylliew 27 : Ki Nongialam bala don slem bha bad ka NPP na Ri-lum Garo kila wan kiew kyrkieh sha Shillong ban iakynduh ia u National President bad Myntri Rangbah Conrad K Sangma ha kaban ai jingmut ia u/ka kyrtong ban iakhun ia ka elekshon shiteng samoi na Gambegre.
Ka Elekshon shiteng samoi ha Gambegre kan long hadien ka jingiehnoh kam jong u Saleng A Sangma kum u MLA da ka jingjop ia ka elekshon Lok Sabha na Tura constituency.
Kat kum ki khubor kila don haduh 10 ngut ki briew kiba la pan ticket na ka NPP ban iakhun ia kane ka elekshon ba kynthup ia ki MDC ka GHADC.
Ha ka jingiakynduh ia u Myntri Rangbah Conrad K Sangma ha Iingsah hynnin ka janmiet sngi Balang ha Shillong, ki 10 ngut ki briew ba pan ticket kila mynjur ban iaid kat kum ka rai jong ka party haba phai sha ka jingpynbna ia u/ka kyrtong bad kular ruh ban ai ka jingkyrshan bad trei na ka bynta ka jingjop jong ka NPP ha kane ka elekshon shiteng samoi.
Kiba bun ki kyrtong ki MDC ka GHADC bad kiwei ki nongialam kila mih ban long kum ki kyrtong hynrei na ki nongtrei ka party pat ki kwah ban don ia ka dur thymmai bad u/ka kyrtong kiba khlain lada ka NPP ka dei ban knieh noh ia ka Gambegre na ka kti jong ka Congress.
Kiba bun ki nongtrei ka party kila pynpaw ia ka jingangnud ban iohi ia ka Dr Mehtab Chandee A Sangma, ka kurim jong u Myntri Rangbah ka Jylla Conrad K Sangma ban long ka kyrtong ha kane ka elekshon shiteng samoi.
Lada ka party ka ai ticket ia ka, kan long ka sienjam kaba paka eh ia ka NPP haba phaikhmat sha ka Trinamool kaba thmu ban ai ticket ia ka MDC ka Dengnakpara Sadhiarani M Sangma, kurim u Zenith Sangma, ba kan iakhun ia kane ka elekshon.
Ka Sashiarani kala wan ba-ar ha ka elekshon MLA ba long mynshem snem na Ganbegre.
Nalor kata, ka MLA barim ka Williamnagar bad Working President ka Congress, Deborah Marak ruh ka dei kawei na kiba iaknieh ia ka ticket jong ka Congress.
Ki kyrtong kiba la paw na kiba pan ticket ka NPP ki kynthup ia u MDC ka Nogorpara u Linekar K Sangma bad u MDC ka Babelapara Rakesh A Sangma.
Hynrei, u Rakesh u dei uba la shah rem kput bha ha ka elekshon MLA jong u snem bala lah ha u Salang Sangma bad wan ba lai ha kane ka elekshon hadien jong ka MDC ka Dengnakpara ka Sadhiarani M Sangma.
