Shillong, Risaw 11: Ka 3rd State Level Inter-School Traditional Singing Competition kala kut noh ha ka jingiphuh iphieng ia kaba la pyninam ia ka jingriewspah ka kolshor jong ka jylla Meghalaya.
Ha kane ka jingiakob rwai tynrai kaba la pynlong ha Lariti Performing Centre, ia ka nam lahduh ha ka liang ka kynhun la ioh da ka Synod School katba ka Meghalaya Public School kala long ka lahduh ha ka jingiakob rwai shimet.
Ia kane ka jingiakob la pynlong da ka Tnad Arts & Culture ryngkat ka jingiatreilang bad ka Shillong Public School, ha kane ka prokram la iohi ia ka jingiashimbynta shitrhem jong ki khynnah na ki skul bapher bapher kiba don ha ka jylla.
Nalor ka rwai ki khynnah kila kup ruh ia ka dur kaba itynnad lyngba ka riam tynrai ka jongki bad kila pynsngewtynnad ia ki nongpeitkai lyngba ki jingsawa kiba mih na ki jingtem tynrai jong ki riewlum.
Haba kren kum u Kongsan u Principal Secretary u Bah FR Kharkongor ula banjur ia ka jingkongsan ban pynneh pynsah ia ka kolshor tynrai bad ban pyniasoh bad ka mariang.
Ula pynthikna ban bteng ia ka jingai jingkyrshan ban pynlong ia kum kine ki prokram, kiba thmu ban kyntiew ia ka jinglong tynrai bad jinglong kyrpang.
Katba ka Kong Silbi Passah kaba la ioh ia ka khusnam Padma Shri, kala pynkynmaw ia ki khynnah bad ia ki nongpeitkai shaphang ka jingriewspah bad ia ka kolshor kaba naduh hyndai hynthai bad kala pynbyrngia ia ki baroh lyngba ki jingrwai bad ki phawer tynrai.
