Imphal, Nailar 22 : Ka Nemnunhoi Khongsai ka la ioh ban rah ia ka nam lahduh ha ka jingiakop thei bhabriew ba la tip kum ka “Miss Pineapple Queen 2022,” ia kaba la pynlong shibynta jong ka tamasa sohtrun (pineapple) ha Manipur.
Ka Nemnunhoi ka dei na ka shnong Lhungtin kaba hapoh Saikul, Kangpokpi district ka Manipur.Ia kane ka tamasa ba ar sngi la khot pynlong hapoh ka shnong Bunglon, kumba 45 kilomitar shathie sepngi na ka nongbah Imphal hapoh Churachandpur.
Ka khusnam kaba ar bad kaba lai ha kane ka jingiakop ka leit sha ka Nengjaikim Baite bad ka Irengbam Pinky Devi.
Ki hynriew tylli kiwei pat ki khusnam ki leit sha ka Chinmuankim Simte (best personality), Florence Vaiphei (Best model), Rachel Kom (Best costume), Dina Kipgen (Best pineapple promoter), Elise Chineihing Lhanghal (Best designer) bad Hoilenkim Touthang (Best sloganner).
Kitei ki laingut ki lahduh ha kane ka jingiakop ki la ioh ia ka khusnam kaba T. 50, 000, T.40,000 bad T. 30,000, katba kitei kiwei pat ki hynriew ngut ki la ioh mar T.7,000.Baroh ki don 14 ngut kiba la wan iashim bynta ha kane ka jingiakop na ki bynta bapher bapher ka jylla.
Ki MLA kiba kynthup ia ka S Kebi Devi ( na Naoriya Pakhangba), U Th Shanti (Moirang), u Letzamang Haokip (Henglep) bad ka Kimneo Hangshing (na Saikul) nalor kiwei pat ki heh ophisar sorkar ki la iadon lang ha ka sngi pynkut ia kane ka Tamasa ha kane ka sngi Saitjain ba la lah.
Nalor kata palat 50 ngut ki nongrep sohtrun ruh ki la wan iashim bynta ha kane ka tamasa.
Ia ka khusnam nongrep sohtrun ba tbit eh la ioh rah da ka Lamhoih na Khousabung, Irine Chinneihtheing na Bunglong bad ka Hatchin na ka shnong Molvon, kata baroh kiba dei napoh Churachandpur district kiba la ioh pdiang ruh ia ka khusnam kaba da ka pisa ka ba long T.50, 000, T. 40,000 bad T. 30,000 ha ryngkat ki syrnot.
