Tura, Nailar 22 : Kawei ka samla pule ba wadbniah ia ka jingdon ki Dohkha ha ki wah ka Ri-lum Garo kala lap ia ka jait dohkha khla kaba rit bad bym ju kham iohi koit ia kaba la tip kum ki Pseudolaguvia meghalayaensis.
Ia une u kha khla la lap ha ki bynta jong ka sdat jong ka wah Rongkil bad Rongdal, kaba don ha North Garo Hills District.
Ka Pringranchi Dokgre Marak, kaba dei ka samla pule Zoology ka Assam Don Bosco University (ADBU), kala phah ia ka jingthoh ka jong ka sha u Dr. Yumnam Lokeshwor Singh, associate professor ka zZology department ha ADBU ha kaba iadei bad kine ki jait jingthaw ki bym ju iohi koit.
Lah ban pyniapher ia kine ki jait dohkha ha ki arjait, kata da kaba pynshong nongrim kat kum ka jingdon ki shnat marjan u budlum jong ki.
Ki jaka ba la ai um da ka wah Brahmaputra bad ki shnat jong ka ha Assam ka dei ka jaka kaba don ia kumba 12 na ki 14 ki jait dohkha khla kiba ki shnat jong ki , ki don marjan bad u budlum.
Ia ki jait dohkha khla ba la tip kum ki An ‘Alligator gar’ (Atractosteus spatula), ki dei ki jait jingthaw ba phylla hapdeng ki dohkha ia kiba la lapdien tang ha ki thain North America, la lapdien napoh kawei ka pung kaba rit ha Mangaldai, Assam ha u bnai Jymmang 2020, ka jinglap kaba la wanrah ia ka jingkyndit kaba khraw.
Katkum ki khubor, la ong ba ka kynhun ki nongkhwai na ka shnong kaba hapoh Upahupara kila lapdien ia kine ki jait dohkha ba phylla katba ki dang khwai hapoh kawei ka pung ha kane ka jaka.
Na ka liang ki trai shnong kila ialum lang hajan katei ka pung hadien ba kila sakhi ia ka jait dohkha ka bym lah ban tip kyrteng kaba don ia ka jingkhia ka ba kumba san kilo.
