Shillong Jylliew 06: Ka tnad ka Koit ka Khiah kala shimkhia bha halor ka jingkhlad jong kawei ka longkmie bad i khun ba dang pun hapoh kpoh, kaba la jia ha ka Maternal and Child Health Hospital, Jowai, West Jaintia Hills District bad kala byrngem ba kan shim da ki sienjam kiba tyngeh ia ki nongai jingsumar lada ka jingtohkit majistor ne Magisterial Inquiry ka lap ba kane ka jingjia kala jia tang namar ka jingleh sting ia ka kam.
Haba iakren bad ki nonghpathai khubor ha ka sngi Thohdieng, ka Director of Health Service (MCH & FW) ka LE Kharsahnoh kala ong, “Ngi dap da ka jingsngewsih halor ka jingkhlad syndet jong ka (L) Kong Pynche Bareh. Namar ba la don ka ejahar bala tohkit da ki Pulit bad ka Magisterial Inquiry bala khmih da u Deputy Commissioner, West Jaintia Hills, ka khlieh jong ka tnad kala dep ban aiti lut ia baroh ki kaiphod ai jingsumar, ki briew ba don ha ka kam bad ki jingtip ba pura jong kane ka case sha ka Inquiry Committee”.
“Ka jingkhmih bniah halor ka daw tynrai ruh ka dang iaid shakhmat ban lap la ki don kino kino ki jingduna ha ka rukom treikam ne ki jingdkoh ha ka rukom ai jingshakri. Lada ka jingtohkit ka lap ba ka don ka jingleh sting ne jingbym biang ha ka rukom ai jingsumar, ngin sa shim ia ki lad pynsajia kiba thikna pyrshah ia kito ki nongai jingsumar” kala byrngem.
Ka la ong, “Ka tnad ka iai ban ia ka jingshakri kaba khuid, kaba shai, bad ka jingbuh hakhmat ia ka jingshngain ki nongpang bad ngin sa shim ia ki sienjam ban pynbeit kumba donkam ban pynkhlain ia ki rukom ai jingshakri ha kaba iadei bad ka koit ka khiah jong ki longkmie ha kylleng ki jaka ai jingsuamr jong ka sorkar”.
Kala ong, ba kane kam dei satia ka por ban kynnoh hynrei kadei ka por ban khmih bniah ia ka jingdonkam ban pynbha. Ka Dr. Kharsahnoh kala ong, “Kum ka tnad, ngi iengskhem ha ka jingkitkhlieh ban pynthikna ba kum katei ka jingjia ba sngewsih kam dei ban jia biang ha ki snem ban wan”.
Ka DHS kala ong, ba ka Kong Pynche Bareh kaba na Jalaphet, kala shah phah sumar sha MCH hospital Jowai dang ha kane ka taiew hadien ba kala shah sumar ha Sutnga CHC.
“Kala kyntait ban leit sha ka hospital kaba la bthah ban leit ha katei ka miet (2 tarik u Jylliew). La pdiang ia ka ha ka 3 tarik Jylliew ha ka por 12.45 mynsngi bad la khmih bniah da ki doctor. La shem ba ka long kaba bit ba biang bad kadei ruh kaba don ha ka jingtipbriew, ka BP, ka jingtied ki thied bad ka Oxygen Level ki don hapoh u pud uba dei ban don. La khmih bniah bha ia ka kynthup ban peit ia ka ‘Hydration’ bad ban ai dawai namar ba kam shym la don hapdeng ka jingsuhkha, kumta haba kam shym la don kano kano ka dak jong ka jingma la buh noh shwa ia ka hapoh ka jingshah khmih bniah” ka la ong.
Kala ong, ba ha ka step jong ka 4 tarik u Jylliew, la khmih bniah ia ka da ki doctor, kiba la pynthikna ia ka jingbym donkam ban leh kyrkieh ha kaban puid ne ban Operate kumta la bteng biang ban don pat ha ka jingshah khmih bniah.
“Ha ka por 6.20 mynmiet, kala ud ba kala don ka jingpang ha ka kpoh bad la pynkit noh ia ka sha ka Unit ban khmih bniah bha hynrei ha ka por 7.15 mynmiet, ki bahaiing jong ka nongpang kila kyrpad ban pyllait noh ia ka ban leit sha kawei pat ka jaka sumar. Katba ki doktor ki dang pynbit pynbiang ia ki jingdonkam ban pyllait ba kan leit sumar sha kiwei ki hospital, kia kyntu ruh ia ki bahaiing ban pynkhreh ia ka kali kit nongpang. Ha ka por kumba 8 baje mynmiet, ka ne ka longkmie kala kem tlot bad ym lah ring mynsiem, ym tip briew shuh bad ka Oxygen ruh kala hiar, ki bynta kiba hapoh ka met bad ka Blood Pressure kila hiar kynsan. Kumta la sdang noh ban ai jingsumar mardor bad ki (doctor) kila leh mardor ia ka Resuscitation hynrei ym shym la lah shuh ban pynkyndit ia ka na ka jingbym tip briew. Kumta la pynbna ba kala khlad noh ha ka por 9.30 hapdeng jong ka jingpyrshang ban pynkyndit bynriew ia ka” la pynapw ka Kong Kharsahnoh.
