Shillong, Jylliew 06 : Ki Pulit ka Laitumkhrah Police Station, hynne ka miet sngi Thohdieng, kila ioh ban kem ia arngut ki nonglute, kiba ju lute ia ki nongiaid lynti, na ka thain Laitumkhrah.
Kine ki nonglute ki kyrteng u Kikbok Thabah ba 27 snem ka rta na ka shnong Golflink bad u Melvin Tongwah ba 22 snem uba dei na ka shnong Lumshyiap.
U Superintendent of Police ka East Khasi Hills Bah Vivek Syiem u iathuh ba hadien ka jingioh pdiang ia ki jingujor na ki briew ba ki shah lute katba ki dang iaid lynti ha ki arngut ki briew ki bym lah ban ithuh, kiba wan da ka scooty rong iong, ka Special Team jong ka Laitumkhrah Police Station ba ialam da ka Officer Incharge Insp Lily Nongkhlaw lem bad katto katne ki riew paidbah, kila ioh bat ia kine ki arngut ki runar ba niah scooty rong iong hajan ka NEC Nongrim Hills katba ki dang pyrshang ban lute ia uwei u nongiaid lynti.
U bah Vivek u iathuh ba kine ki runar kila tynrah ruh da u screwdriver ia une u nongiaid lynti na ki bynta jong ka Kpoh. Kane ka jingjia kala jia ha ka por 8:30 baje mynmiet.
Ki Pulit ka Laitumkhrah kila register ia artylli ki case shah lute pyrshah ia kine ki runar halor ka jingdonkti ha ki artylli ki kam lute-kawei kaba jia ha ka 10 tarik Iaiong por 8:30 mynmiet hajan Bawri Mansion bad kawei pat kaba jia dang ha ka 3 tarik Jylliew por 7 baje mynmiet hajan Nagaland House.
U iathuh ba ha ka jingjia ha Bawri Mansion, kine ki runar kila ioh ban lute haduh T.19,000 katba ha ka jingjia ba jia marjan ka Nagaland House, kila ioh ban lute T.5000.
U iathuh ba la ioh lum jingtip ruh ba kine ki runar kila leh ia kum kine ki kam bymman ia kiba bun ki briew hynrei kine ki briew kim shym la wan shakhmat ban pyntip.
U iathuh ba u Melvin Tongwah u dei uba la shah kem teng mynta u snem namar ka jinglute briew ha ki thain Polo bad la kem ia u da ki Pulit ka Pastuer Beat House.
