Jowai, Lber 26 : U Chief Executive Member (CEM) ka Jaintia Hills Autonomous District Council (JHADC) Bah Thombor Shiwat, ha ka sngi Balang ula wanrah ia ka mang tyngka kaba duna T.11.32 klur na ka bynta u snem 2025-26.
U CEM haba kren maitphang ia ka mang tyngka la ong “Na ka bynta une u snem mang tyngka 2025-26, ka jingantad ban ioh lum pisa ka long T. 245,90,55,900 katba ka jingpynlut antad ka long T. 257,23,44,200, kaba pyni ia ka jingduna pisa ba T.11,32,88,300”.
Ula batai ha kane ka mang tyngka ba mynta, ka Council kala lah ban siew ia ki allowance jong ki 15 bnai hadien ka jingpyllait ia ki song pisa na ka Sorkar Jylla ha u Kyllalyngkot 2025.
U Bah Thombor ula pyntip ba T.6,32,400 na ka Digital India Land Records Modernization Programme (DILRMP), ka Council kala ioh T.6.32 lak ha u snem 2024-2025 bad na ka tied bad untied grants, ka Council kala pyntrei ia 422 schemes bad projects ha East bad West Jaiñtia Hills, kum ki surok, ka jingsam umbamumdih, ka jingker kynroh, ka jingsam ia ki CGI sheet bad kiwei kiwei.
Ula iaroh ruh ia ka Executive Committee bala leit halor ka jingtrei shitom khamtam ban pyndep ia ka Jaintia Dorbar Hall, kaba la plie paidbah ha u Risaw 2024 wat hapdeng ka jingduna pisa. Ula kren halor ki jingpynkylla ha ka rukom treikam kum ka rai ba 28 tarik Naiwieng 2020, kaba iarap ban pynduna ia ka jingdon ki nongtrei ka Council n aka 1490 ngut sha ka 1215 ngut tang hapoh ka saw snem, kaba la iarap shibun ia ka Council ban khate ia ka jingpynlut ki bym donkam.
Ula kyntu ia baroh ki dkhot ba kin iatreilang na ka bynta ka bha ka miat bad ka jingmyntoi jong ki paidbah ka Ri-lum Jantia, haba pynskhem biang ia ka jingkut jingmut jong ka Council ban wanrah ia ka synshar khadar kaba bha bad ka jingiatreilang kaba jan na ka bynta ka roi ka par jong ki paidbah ka Ri-lum Jaintia.
