Shillong, Lber 26: Ka 2nd Indo-France 2025 Football Tournament ka la sdang hynne ka sngi Balang ha Paris, France bad ka skul Mynken Christian Secondary School kaba mihkhmat ïa ka Meghalaya, kala pyni ïa ka jingïalehkai kaba itynnad bha pyrshah ïa ka US Grigny FC kaba don ha ka kyrdan R2 jong ka France da kaba jop da 4-0 kol.
Ka jingïalehkai kaba la pynlong ha Grigny Stade, ka la sakhi ïa ka jingïalehkai kaba itynnad jong ka kynhun na Meghalaya, India, kaba la pynlong ïa ka kynhun ïalehkai jong ka France bad ki nongpeitkai ban kyndit bynriew.
Ka kynhun jong ka France kaba la pawnam bha haka jingïalehkai kam shym la khmih lynti ïa kum kane ka kyrdan ïalehkai bala pyni da ka kynhun na Meghalaya, hynrei ki nongïalehkai ka Meghalaya ki la pyni ïa ka jingtbit kaba kyrpang, ka jingsted, bad ka jingïalehkai kaba tbit bad kaba pynshoh beij iaki nongpeit kai.
Napdeng ki nongpeitkai, u Deputy Mayor of Sports, Deputy Mayor of Grigny, bad Director of Sports ka Ri France ula iadonlang bad ula iapbiej bha ia ka rukom ïalehkai jong ka kynhun ka Meghalaya.
Ka jingïalehkai sted bad ka jingkhlain bor bala pyni daka kynhun na Meghalaya ka pyni bad ka kren iaka jingsdang paw bad ka jingkiew jong ka kyrdan ialehkai Football hapoh ka Ri India.
Ka jingjop da 4-0 kol kam dei tang ka jingjop ïa ka kynhun hynrei ka dei ka jingsarong kaba khraw bha ïa ka phutbol India ha ka pyrthei bad kane ka jingïalehkai ka la pynshisha ba ki kynhun jong ka India ki lah ban ïakhun ha ka kyrdan kaba heh pyrshah ïa ki klob jong ka Europe kiba la pawnam bha.
Mynta ka kynhun ïalehkai ka Meghalaya ka la pynleit jingmut pura ha ka jingïakhun kaban wan pyrshah ïa ka Versailles FC ha ka 26 tarik mynta u bnai
Lah ban kdew ba ka Versailles FC la tip ba ka dei kawei na ki klob ba khlaiñ tam ha France.
Ka jingïalehkai phutbol Indo-French ka plie lad na ka bynta ka ka jingiadei hapdeng ka India bad ka France lyngba ka jingïalehkai phutbol bad ka plie ïa ki lad ki lynti kiba thymmai na ka bynta ki samla kiba don sap ha ka jingïalehkai.
