Shillong Naiwieng 09: Ka Khasi Students’ Union (KSU) Mawprem Circle ha ka miet sngi u Blei kala leit jurip ha ki bynta bapher bapher jong ka Mawprem bad kala pynsangeh ïa ki briew kiba dang thang bom hadien ba la kut ka por ba la buh da ki bor pyniaid District.
“Kane ka sienjam ka long hadien ba ka Seng ka la dep phah ïa ka dorkhas sha u Deputy Commissioner (DC), ban dawa ba dei ban pyntreikam hok ïa ki kyndon bad ki por ba la buh da ka Supreme Court ha kaba ïadei bad ka jingthang bom” la pynpaw u samla Stefford Kharjahrin, Environment Secretary ka KSU Mawprem Circle ha ka kyrwoh.
Ula ong ba ka Seng, ka pynkynmaw ba katkum ka Notice ba la pynmih da ki bor pyniaid District lyngba u Magistrate, ka por ba la buh ban thang bom ka long tang naduh ka por 8 baje haduh 10 baje mynmiet.
Ha kaba ïadei bad kane, ka KSU Mawprem Circle ka pynshai ba kane ka sienjam kam dei satia ban khanglad ïa ki paidbah ban rakhe, hynrei ka long ban pynthikna ba baroh ki paidbah kin burom bad bud ryntih ïa ki kyndon bad ki aiñ kiba la buh da ki bor kiba dei khmih.
“Ka Seng ka ngeit skhem ba ka jingrakhe jong uwei kam dei ban long ka daw jong ka jingeh bad jingktah ïa kiwei pat, khamtam eh ïa ki para marjan. Kumta, ka Seng kala kyntu ïa baroh ki paidbah ban long kiba don ka jingkitkhlieh, ban burom ïa ka aiñ bad ban pyrkhat lem ïa ka jingshong suk bad jingshngain jong baroh” la pynkut u samla Stefford Kharjahrin.
